វិជ្ជាមេផ្ទះ​៖ បាយឆាសាច់ក្រក​និង​សណ្ដែកហឡាន់តាវ(green bean)

គ្រឿងផ្សំ (សំរាប់ក្មេង២ នាក់)

បាយ ២វែក

សាច់ក្រក ២ កង់វែង

ពងទា ១គ្រាប់

សណ្ដែកហឡាន់តាវ ១ពែងតូច

ខ្ទឹមស ២កំពិះសចិញ្ច្រាំម៉ត់

ទឹកប៉េងប៉ោះ(ketchup) ១ស្លាបព្រាបាយ

ទឹកត្រី ១ស្លាបព្រាកាហ្វេ

ស្ករស ១ស្លាបព្រាកាហ្វេ

របៀបធ្វើ

លាយបាយជាមួយ ទឹកត្រី ស្ករស ទឹកប៉េងប៉ោះ ច្របល់ចូលគ្នាអោយសព្វ។ កិនសណ្ដែកហឡាន់តាវអោយម៉ត់ ដាក់លាយជាមួយបាយ ដែលផ្សំគ្រឿងរួច (សុំបើករង្វង់ក្រចកបន្តិច៖ បានជាកិនពីព្រោះ កូនទាំងពីររបស់ខ្ញុំមិនចូលចិត្តបន្លែទេ “អាមួយតូចអត់ទាន់ចេះញ៉ាំទេ” ពេលឃើញសណ្ដែកនេះ គេមុខតែរើសចេញមិនខាន ដូចនេះវិធីរបស់ចុងភៅថ្នាក់ផ្កាយ  ម្នាក់នេះ គឺកិនកុំអោយពួកគេឃើញបន្លែ) ។ លីងសាច់ក្រកដោយប្រើភ្លើងតិចៗរហូតដល់ឆ្អិន ទើបដាក់ខ្ទឹមសចូល រួចគោះពងទាដាក់ ល្មមតែពងទាជិតឆ្អិន ចាក់បាយដែល លាយគ្រឿងនិងសណ្ដែកចូល បន្ថែមភ្លើងបន្តិច ឆាត្រឡប់ចុះឡើង ដល់ចូលជាតិឆ្អិនសព្វជាការស្រេច។

សូមអញ្ជើញពិសារ៖

អនុស្សាវរីយ៍​ថ្មី​មួយទៀត​សំរាប់​យើង

ថ្ងៃទី១២ឧសភានេះ ជាថ្ងៃកំណើតប៉ាអាបីនាក់។ យើងទាំង៥នាក់ បាននាំគ្នាទៅញ៉ាំបាយខាងក្រៅផ្ទះ។ មុនពេលទៅ ហេតុតែចង់អោយប៉ាប៉ាយល់ព្រមទៅ នូនូបានសន្យាថាចាំមកវិញគេនឹងធ្វើកាតជូនពរអោយប៉ាគេ។

ពេលដែលត្រឡប់មកវិញ ទាំងនូ ទាំងនាង បានខំខ្នះខ្នែង

ធ្វើនិងផាត់ព៌ណកាតជូនពរអោយប៉ាប៉ា។

នាងនាង សួរប៉ាប៉ាថា៖ ចង់បានកាតព៌ណអីដែរ?

ប៉ាប៉ា៖ ព៌ណអីក៏បានដែរ។ ស្រេចតែកូន។

នាងនាង៖ អូខេ

នូនូ ឃើញបងវាសូរអញ្ចឹង ក៏ស្ទុះវឹង ទៅសួរដែរ។

នូនូ៖ ប៉ាប៉ាចង់បានកាតព៌ណអីទៅ ប៉ាប៉ា?

ប៉ាប៉ា៖ ចង់បានព៌ណ pink (ព៌ណផ្កាឈូក)។

នូនូ៖ យី! ចុះប្រុសអីស្រឡាញ់ព៌ណ pink ចឹង!!???

ប៉ាប៉ា៖    :-?

ហេហហេ ហួសចិត្ត អស់វាចារនឹងថ្លែង អាមួយនេះដាក់ម៉ាម៉ាត់ធ្វើអោយប៉ាប៉ាកប់យោបល់បណ្ដោយ!!!

អាមួយហ្នឹងសួរ បានតែសួរចឹងទេ ដល់សំរេចសំរួល គេរើសព៌ណស្រេចតែចិត្តខ្លួនគេហ្នឹង។ អត់បានព៌ណ pink ហើយ ត្រូវនូនូដៀមដាមអោយទៀតប៉ាប៉ាឯង!!!

        មានតែប៉ុណ្ណឹងឯង  ឯវំ…

កូនពេជ្ររបស់ម៉ាក់

កូនពេជ្រ ពេលនេះកូននៅតូចនៅឡើយ កូនអាយុទើបនឹងបានជាងប្រាំមួយខែប៉ុណ្ណោះ ពិតជាមិនទាន់អាចអានអត្ថបទនេះបានទេ តែម៉ាក់សង្ឃឹមនិងជឿជាក់ថា កូននឹងបានអានវានៅពេលកូនធំដឹងក្ដី។ ម៉ាក់ម្នាក់នេះ មិនដែលគិតថាម៉ាក់នឹង ស្រឡាញ់កូនតិចជាងបងៗរបស់កូនទេ ទោះកូនជាកូនស្រីទី៣របស់ម៉ាក់ក៏ដោយ ម៉ាក់ស្រឡាញ់កូន ព្រោះកូនជាកូនពេជ្ររបស់ម៉ាក់ គឺដូចជាម៉ាក់ស្រឡាញ់បងៗព្រោះ បងនាងជាកូននាងរបស់ម៉ាក់ ឯបងនូជាកូននូរបស់ម៉ាក់ដែរ។

កូនពេជ្រ កូនដ៏សែនស្លូតរបស់ម៉ាក់ កូនមិនដែលធ្វើអោយម៉ាក់ពិបាក អត់ងងុយរូងភ្នែកម្ដងណាឡើយ ប៉ាប៉ាកូនតែងហៅកូនថាអាកំពូលស្លូត ជួនកាលទៀតគាត់ក៏ហៅកូនថាអាដានីតូច ពីព្រោះកូនមានមុខដូចបងនាងរបស់កូន (អ្វីដែលម៉ាក់ចងចាំទុកពីកូននាង)។ នៅអាយុប៉ុននេះ កូនអាចសំគាល់មុខមនុស្សនិងទីកន្លែងបានហើយ ពេលមានអ្នកប្លែកមុខមកលើកកូនព កូនតែងសំលឹងមុខគេដោយងឿងឆ្ងល់។ ពេលដែលប៉ាប៉ាកូនមកពីធ្វើការ កូនតែងយំហៅ«ហ៊ឹមៗៗ»មើលមុខប៉ា ដើម្បីអោយប៉ាលើកកូនពដើរ ពីព្រោះកូនចាំបានថា ប៉ាជាអ្នកដែលតែងលើកកូនពរជានិច្ច រាល់ពេលគាត់ត្រឡប់មកដល់ផ្ទះ ពេលឃើញប៉ាស្លៀកពាក់រៀបទៅធ្វើការ កូនក៏តែងយំ«ហ៊ឺមៗៗ» មើលមុខគាត់ទៀត អោយគាត់ដឹងថាកូនចង់អោយគាត់លើកពចេញទៅក្រៅដែរ។ នៅពេលយប់មកដល់ កូនតែងយំតិចៗមិនសុខមិនសាប់ កាលណាម៉ាក់មិនទាន់បាននាំកូនចូលបន្ទប់គេង តែពេលដែលចូលដល់បន្ទប់គេង កូនបែរជាវៀរនិងលូនលេងយ៉ាងរីករាយ ទើបម៉ាក់សំគាល់បានថា ពេលយប់កូនង៉ិកង៉ក់រកកន្លែងធ្លាប់នៅ ដូចសត្វរកទ្រនំពេលរាត្រីដែរ។  ថ្ងៃនេះ កូនអាចងើបអង្គុយបានដោយត្រង់ខ្នង ដោយមិនចាំបាច់ប្រើដៃច្រត់ទប់ខ្លួនទេ កូនអាចវៀរបានកាន់តែលឿនជាងមុន ម៉ាក់មិនអាចប្រហែសមួយនាទីណាបានទេ បើកូនគេងលក់ ម៉ាក់ត្រូវដាក់កូនអោយគេងនៅក្នុងគ្រែកូនង៉ែតរបស់កូន ជៀសវាងខ្លាចកូនភ្ញាក់ឡើង វៀរធ្លាក់ដី។

ពីមួយថ្ងៃទៅមួយថ្ងៃ កូនកាន់តែធំម្ដងបន្តិចៗ ម៉ាក់នឹងកត់ត្រាជារឿយៗ នូវការលូតលាស់របស់កូនទុកមើលនៅពេលម៉ាក់និងប៉ាចាស់ទៅ ហើយនឹងនឹកឃើញដល់សុភមង្គលដែលកូនមួយនេះបានផ្ដល់អោយប៉ានិងម៉ាក់  ប៉ានិងម៉ាក់នឹងពិតជាក្លាយជាឪពុកម្ដាយដ៏មានមោទនភាព នៅពេលដែលកូនធំធាត់ ក្លាយជាមនុស្សល្អរបស់សង្គមជាតិ។

កុំប្រៀបប្រដូច ជាមួយអ្នកដទៃ

Reblogged from កំណត់ហេតុ​បុត្រា​ខ្មែរ:

យើងមិនអាចដឹងថា ជីវិតអ្នកដទៃយ៉ាងណានោះទេ, គឺបានត្រឹមតែ ធ្វើការវាយស្មាន ពីសំបកក្រៅប៉ុណ្ណោះ, ដូច្នេះ យើងមិនត្រូវ យកខ្លួនយើង ទៅប្រៀបប្រដូច ជាមួយអ្នកដទៃ ឬកម្មសិទ្ធ ដែលគេមាននោះឡើយ។ ចូរធ្វើជាតំណាងខ្លួនឯង គាំទ្រខ្លួនឯង, កំណត់គោលដៅខ្លួនឯង, រស់នៅតាម ឧត្តមគតិរបស់ខ្លួន, កំណត់អនាគត ខ្លួនឯង ហើយផ្តល់ការស្រលាញ់ ឲ្យអស់ពីបេះដូង។ យើងមិនអាច យកប៉ោម ទៅប្រៀបនឹងក្រូចទេ ដូច្នេះកាន់តែមិនអាច យកមនុស្សម្នាក់ ទៅប្រៀបធៀប នឹងម្នាក់ទៀត ពីព្រោះម្នាក់ៗ សុទ្ធតែមិនដូចគ្នា… មានចំណុចល្អ និងចំណុចមិនល្អរៀងៗខ្លួន – គឺគ្មានអ្នកណាល្អគ្រប់ដប់ ហើយក៏មិនប្រាកដថា អាក្រក់ ឬឥតប្រយោជន៍ ទាំងស្រុងនោះដែរ។ ខ្ញុំជឿថា បើចង់ប្រៀបប្រដូច ឬប្រកួតប្រជែង គឺគ្មានអ្វីល្អជាង ការប្រៀបប្រដូច ឬប្រកួតប្រជែង នឹងខ្លួនឯងនោះឡើយ។

«សូមអរគុណ កំណត់ហេតុបុត្រាខ្មែរ ដែលបាន​អនុញ្ញាតអោយខ្ញុំចែករំលែកអត្ថបទនេះ»

អ្វីដែល​ម៉ាក់​ចងចាំ​ទុកពីកូននាង

នាងនាង កូនសម្លាញ់ កូនដែលម៉ាក់តែងហៅថា My Favorite Girl or My Precious Baby  កូនដែលយល់ដឹងការរាក់ជ្រៅច្រើនជាងប្អូនៗ កូនដែលធ្វើអោយម៉ាក់ជឿ នូវពាក្យគ្រប់ម៉ាត់ដែលកូននិយាយប្រាប់ម៉ាក់ ពីព្រោះកូនមិនដែលនិយាយកុហកទេ។ កូនមិនសូវនិយាយស្ដី មិនមាត់ប៉ប្លេចប៉ប្លូច អ្វីដែលកូននិយាយ សុទ្ធតែជាពាក្យសាច់ការទាំងអស់។

នឹកឃើញដល់ពេលដែលកូនចូលរៀនដំបូងថ្នាក់មត្តេយ្យ កូនអាយុទើបបានបីឆ្នាំប៉ុណ្ណោះ ម៉ាក់ទៅតាមកូន ចូលរៀនជាមួយកូន លុះបានពីរថ្ងៃ ម៉ាក់ក៏ទុកកូនអោយនៅជាមួយអ្នកគ្រូ ពេលម៉ាក់ចេញមក ម៉ាក់លួចមើលកូនតាមបង្អួច ម៉ាក់ឃើញកូនយំ យំនោះយំ តែមិនមាននរណាលួងកូនសោះ គ្រូម្នាក់នោះទុកកូនអោយយំតែម្នាក់ឯង ក្នុងចិត្តម៉ាក់ក្ដុកក្ដួលណាស់ ម៉ាក់រលីងរលោងទឹកភ្នែក ម៉ាក់បន់អោយតែដល់ម៉ោងចេញលេង ម៉ាក់នឹងអាលចូលទៅលួងកូន។ ទីបំផុត ម៉ាក់សុំដូរកូនអោយទៅរៀនជាមួយគ្រូម្នាក់ទៀត ដែលមានការយកចិត្តទុកដាក់ខ្ពស់ចំពោះសិស្សថ្មី។ បានតែមួយអាទិត្យប៉ុណ្ណោះ កូនអាចទៅរៀនតែម្នាក់ឯងដោយរីករាយ។ នាងនាង កូនរៀនពូកែជាងគេនៅក្នុងថ្នាក់  ខែណាក៏កូនរៀនបានលេខ១ដែរ កូនជាកូនដែលធ្វើអោយម៉ាក់ញញឹមបិទមាត់មិនជិត រាល់លើកដែលមានការជួបពិភាក្សារវាងអ្នកគ្រូនឹងមាតាបិតាសិស្ស។ កូនមានការចងចាំល្អបំផុត អ្វីដែលម៉ាក់ប្រាប់ឬពន្យល់ តែម្ដងប៉ុណ្ណោះ កូនក៏អាចចងចាំបាន។ ម៉ាក់នឹកដល់គ្រាមួយនោះ កូនអាយុជាងមួយឆ្នាំប៉ុណ្ណោះ កូនអង្គុយលើភ្លៅប៉ាប៉ាកូន មើលរូបភាពក្នុង កុំព្យូទ័រ ពេលឃើញរូបផ្លែប៉េងប៉ោះទុំ កូនសំរូតចុះពីប៉ាប៉ារត់មកបើកសៀវភៅតូចរបស់កូន ដែលមានរូបដូចគ្នានឹងរូបនៅក្នុង កុំព្យូទ័រ ចង្អុលប្រាប់ម៉ាក់និងប៉ាទាំងមិនទាន់ចេះនិយាយផងថា«អ៊ុះៗ» ទើបម៉ាក់ដឹងថា ក្មេងពិតមែនតែមិនទាន់ចេះនិយាយមែនតែ គេអាចសំគាល់បាននូវអ្វីដែលគេធ្លាប់បានឃើញ។

យប់នេះ កូនស្រាប់តែធ្វើអោយម៉ាក់អស់សំណើចនឹងសំដីកូន។ ក្រោយពេលបាយល្ងាចរួច កូនមើលល្ខោនបាសាក់ទូរទស្សន៍ ទទក ពេលចេញដល់តួយក្ខ កូនសើចបណ្ដើរនិយាយប្រាប់ម៉ាក់បណ្ដើរថា «ម៉ាក់ហា៎ យក្ខនេះ ធាត់អីក៏ធាត់ម៉េះទេ មើលចុះ លោតចេញក្បាច់មិនចង់រួចទេ» ម៉ាក់ដែលកំពុងតែលេង«ហ្វេសប៊ុក» ក៏ចាក់បណ្ដោយនឹងកូនទាំងមិនមើលទូរទស្សន៍ថា«យក្ខហ្នឹង បែបផឹកស៊ីរាល់យប់ហើយកូន» កូនក៏តបថា «មែនហើយ បែបយក្ខចូលចិត្តតែញ៉ាំ Hot dog Pizza Humburger French fries រាល់ថ្ងៃហើយបានជាធាត់ចឹងនោះ!» …..យី  ម៉ាក់មិនដឹងសោះថា នៅស្រុកយក្ខមានរបស់អស់នេះញ៉ាំដែរសោះណ៎!!!! ពិតជាគួរអោយហួសចិត្តនឹងសំដីក្មេងៗណាស់!!!

មើលអត្ថបទស្រដៀង៖ អ្វីដែលម្ដាយម្នាក់នេះចង់កត់ត្រាទុក៖ នូនូកាលពីអាយុ២ឆ្នាំ

អ្វីដែលម្ដាយម្នាក់នេះ​ចង់កត់ត្រាទុក៖ នូនូកាលពីអាយុ២ឆ្នាំ

នូនូកូនសម្លាញ់ ម៉ាក់ស្រាប់តែនឹកឃើញ ចង់កត់ត្រាទុក នូវអនុស្សាវរីយ៍វ័យកុមារទាំងឡាយរបស់កូនទុក ព្រោះថាដប់ឆ្នាំ ម្ភៃឆ្នាំទៅមុខទៀតនោះ ម៉ាក់នឹងចាស់ហើយអាចភ្លេចភ្លាំងរឿងរ៉ាវល្អៗ ដែលកូនបានផ្ដល់អោយម៉ាក់និងប៉ា។

នូនូ កូនស្រីទី២របស់ម៉ាក់ កូនដែលមានសំរស់ស្អាតជាងគេ និងមានសម្បុរខ្មៅជាងគេ ក្នុងចំនោមកូនស្រីទាំងបីរបស់ម៉ាក់ កូនដែលមានមុខមាត់ដូចគ្នាបេះបិតនឹងប៉ាប៉ាកូន ។កូនដែលធ្វើអោយអ្នកផ្ទះហួសចិត្តសើចសប្បាយ នឹងភាពក្រម៉ិចក្រម៉ើមរបស់កូន។ កូនជាក្មេងដែលឆ្លាតវៃនិងក្បាលខូចជាងគេ ដូចពាក្យមីងមានិយាយលេងសើចថា អាកណ្ដាលហ្នឹងខូចជាងគេ។ នូនូ ដែលពូកែងង៉ក់ច្រើនជាងគេ ដែលតែងទាមទារចំណាប់អារម្មណ៍ពីម៉ាក់ជានិច្ច នូនូដែលតែងធ្វើអោយម៉ាក់អស់ភាពអត់ធន់ ហើយស្រែកជំទាលដាក់ រាល់ពេលដែលកូនរអ៊ូរញ៉ាំរញ៉ូវរករឿងម៉ាក់។ ម៉ាក់សុំទោស ដែលម៉ាក់ទប់ចិត្តខឹងមិនបាន ហើយក៏ស្រែកឡូឡាដាក់កូនរាល់លើកដែលកូនចង់បានការយកចិត្តទុកដាក់។ មានពេលមួយនោះ កូនអាយុបានប្រហែល២ឆ្នាំជាង ម៉ាក់ នាងនាង និងកូននូ យើងបីនាក់ម៉ែកូន បើកឡានជូនប៉ាប៉ាកូនទៅឡើងយន្តហោះ ពេលត្រឡប់មកវិញ កូននូដល់ពេលត្រូវគេងថ្ងៃ ហើយរាល់ពេលគេង កូនតែងទាមទារចង់អោយម៉ាក់អោបមុនគេង តែម៉ាក់ពេលនោះកំពុងតែបើកឡាន ធ្វើយ៉ាងណាអាចអោបកូនបានទៅ? កូនបានយំម្ញ៉ិកម្ញ៉ក់ រករឿងម៉ាក់ ម៉ាក់ក៏ស្រែកថា «កូនមិនឃើញម៉ាក់កំពុងបើកឡានទេហី បើងុយគេងហេតុអីមិនគេងទៅ»? នូឆ្លើយថា «នូងុយគេងណាស់ ម៉ាក់ឈប់បើកឡានទៅ អោយនូចុះគេងតាមផ្លូវហ្មងទៅ» សំដីនេះធ្វើអោយម៉ាក់លែងខឹង បែរជាអស់សំណើចទៅវិញទេ នូក្បាលខូច នូមេរករឿងដឹងតែពីធ្វើយ៉ាងណាតាមតែចិត្តខ្លួនឯង និយាយទាល់តែម៉ាក់លែងមានពាក្យតបទៅកូនវិញបាន។ ហើយមានពេលមួយនោះទៀត ពេលម៉ាក់បើកឡានត្រឡប់មកពីទិញឥវ៉ាន់នៅផ្សារឡាក់គីជាមួយពួកកូន នូនូក៏រអ៊ូដាក់ម៉ាក់ដដែលៗថា «នូស្រេកទឹកណាស់ម៉ាក់ៗៗៗៗ» តែនៅក្នុងឡានយើងមិនមានទឹកមួយដបណាសោះ ម៉ាក់ប្រាប់កូនថាជិតដល់ផ្ទះហើយ ចាំញ៉ាំទឹកឯផ្ទះបានទេ តែនូដែលប៉ិនរអ៊ូនៅតែនិយាយថា «ស្រេកទឹកណាស់ៗៗ ម៉ាក់ឈប់ឡានផ្ទះគេទៅ សុំទឹកគេអោយនូញ៉ាំ»។

នៅមានរឿងជាច្រើនទៀតទាក់ទងនឹងកូននូ ដែលម៉ាក់នឹងកត់ត្រាទុក សំរាប់មើលពេលដែលកូនធំដឹងក្ដី ហើយរឿងអនុស្សាវរីយ៍ទាំងនេះ នឹងនាំមកនូវស្នាមញញឹមរាល់ពេលដែលម៉ាក់អានវាឡើងវិញ វានឹងធ្វើអោយម៉ាក់ បានគាស់កកាយឡើងវិញនូវភាពរីករាយនិងសុភមង្គលដែលកូនបានផ្ដល់អោយម្ដាយម្នាក់នេះ។

អរគុណម៉ាក់

“ថ្ងៃនេះ កាលពី២៩ឆ្នាំមុន ម៉ាក់បានផ្ដល់កំណើតដល់កូន កូនមិនធ្លាប់ដែលដឹងថាម៉ាក់ស្រឡាញ់កូនខ្លាំងយ៉ាងណាទេ រហូតដល់ថ្ងៃដែលកូនមានកូនដោយខ្លួនឯង ទើបកូនយល់អស់ពីជំរៅចិត្តស្នេហារបស់ម្ដាយម្នាក់នេះ។ ថ្ងៃមួយនោះ កាលកូននៅតូច មិនដឹងថាតើម៉ាក់បារម្ភពីកូនប៉ុណ្ណា ពេលដែលកូនដើរលេងបាត់ពីផ្ទះជាមួយមិត្តរួមល្បែងដោយមិនប្រាប់ម៉ាក់? មិនដឹងថាម៉ាក់ឈឺចិត្តប៉ុណ្ណាទេ ពេលដែលម៉ាក់លើករំពាត់វាយកូនពេលនោះ? មិនដឹងថាម៉ាក់ធ្លាប់អត់ងងុយប៉ុន្មានយប់ទេ នៅពេលកូនក្ដៅខ្លួននោះ? មិនដឹងថាម៉ាក់ព្រួយចិត្តប៉ុណ្ណាទេ ពេលដែលកូនរឹងទទឹងតមាត់នឹងម៉ាក់នោះ? អរគុណម៉ាក់ ដែលផ្ដល់កំណើតដល់កូនស្រីម្នាក់នេះ….”

អរគុណម៉ាក់ ដែលប្រៀនប្រដៅកូនឲ្យក្លាយជាមនុស្សល្អ

អរគុណម៉ាក់ ដែលមិនទំរើសកូនស្រីតែមួយម្នាក់នេះ ហើយបានបង្ហាត់អោយកូនចេះកិច្ចការផ្ទះនិងក្លាយជាមេផ្ទះល្អម្នាក់

អរគុណម៉ាក់ ដែលតឹងតែងចំពោះកូនស្រីដើម្បីកូនអាចក្លាយជាកុលស្ត្រីម្នាក់

អរគុណម៉ាក់ ដែលបណ្ដុះទឹកចិត្តស្រឡាញ់ជាតិមាតុភូមិដល់កូនគ្រប់គ្នា

អរគុណម៉ាក់ ដែលឈរនៅខាងកូន ចាំគាំទ្រកូនជានិច្ច

  ♥♥♥កូនស្រឡាញ់ម៉ាក់♥♥♥

កំប្លែង៖ ស្មានតែខ្មោចគ្នាឯង!!!

«ខ្ញុំខានដាក់ប្រកាសយូរដែរហើយ ដូចនេះដើម្បីកុំអោយស្ងាត់ភូមិយើង សូមអានហើយចាក់ក្រលេកគ្នាសើចផង    :D»

នៅយប់មួយម៉ោងប្រមាណជា១២យប់មានខ្មោចបីនាក់បានជួបពិភាក្សាគ្នា។ ខ្មោចដែលឈរនៅខាងឆ្វេងបានសួរទៅខ្មោចដែលនៅខាងស្ដាំថា ៖ ”នែ អាខ្មោចដែលឈរនៅខាងស្ដាំតើឯងស្លាប់ដោយសារអ្វី?” ខ្មោចដែលឈរនៅខាងស្ដាំឆ្លើយ ៖ ”យើងវេទនាណាស់ គឺយើងស្លាប់ដោយសារចោរប្លន់ គឺគេបាញ់គ្នាចំនួនពីរគ្រាប់ ត្រង់ក្បាល និង ត្រង់ដើមទ្រូង”។ ឆ្លើយចប់ខ្មោចឈរនៅខាងស្ដាំបានសួរទៅកាន់ខ្មោចដែលឈរនៅខាងឆ្វេងវិញម្ដង ៖ “រួចចុះឯងស្លាប់ដោយសារអ្វីដែរ?” ខ្មោចដែលឈរនៅខាងឆ្វេងឆ្លើយថា ៖ ”យើងក៏មិនខុសពីឯងដែរ គឺយើងស្លាប់ដោយសារឡានបុក ហ៊ីហ៊ីហ៊ី”។ បន្ទាប់ពីខ្មោចទាំងពីរឆ្លើយប្រាប់គ្នារួចហើយ គេក៏សួរទៅខ្មោចដែលឈរនៅកណ្ដាលវិញថា ៖  ”ចុះឯងស្លាប់ដោយសារអ្វីដែរទៅ?” ពេលឮដូចនេះ អ្នកដែលឈរនៅកណ្ដាលក៏ស្រែកយំហ៊ូរ ហ៊ូៗៗៗ ឃើញដូចនោះខ្មោចដែលឈរនៅសងខាងនឹកគិតថា ប្រហែលជាវាកំសត់ជាងខ្លួនទៀតមើលទៅ ហើយក៏ប្រាប់ទៀតថា ៖ ”ឯងកុំយំអី ប្រាប់គ្នាមកចាំគ្នាជួយរំលែកទុក្ខឯងណាសំឡាញ់” ពេលឮហើយអ្នកឈរនៅកណ្ដាលឆ្លើយទាំងញ័រថា ៖ ”ខ្ញុំអត់មានស្លាប់ដោយសារអ្វីទេ! ហើយខ្ញុំពុំទាន់ស្លាប់ដែរ ពេលនេះគឺខ្ញុំមក បត់ជើងធំតែប៉ុណ្ណោះ!!!”  

សារធាតុគីមីលើចំណីអាហារ៖ ម្សៅស

សព្វថ្ងៃនេះសារធាតុគីមីជាច្រើនត្រូវបានគេប្រើប្រាស់លើចំណីអាហារ ដើម្បីធ្វើអោយអាហារអាចរក្សាទុកបានយូរ និងមើលឃើញថានៅល្អឬនៅស្រស់។ សារធាតុគីមីខ្លះអាចប្រើបានក្នុងកំរិតកំណត់ណាមួយ ដើម្បីរក្សានូវគុណភាពអាហារ ប៉ុន្តែសារធាតុខ្លះ មិនអាចប្រើប្រាស់បានទាល់តែសោះជាមួយនឹងចំណីអាហារ ពីព្រោះវាអាចបណ្ដាលអោយប៉ះពាល់យ៉ាងធ្ងន់ធ្ងរដល់សុខភាពមនុស្ស។

សារធាតុ Sodium Hydrosulfite(Na₂S₂O₄) ដែលគេស្គាល់ជាទូទៅថា ម្សៅសឬថ្នាំស អាចបណ្ដាលអោយមានគ្រោះថ្នាក់ចំពោះសុខភាព។ អ្នកលក់ចំណីអាហារប្រើប្រាស់ម្សៅសនេះ ក្នុងគោលបំណងអោយទំនិញរបស់ខ្លួនមើលទៅឃើញសស្អាតនៅស្រស់គួរអោយចង់បរិភោគ។ពួកគេប្រើប្រាស់តាមការប្រាប់តគ្នាដោយមិនបានយល់ពីផលប៉ះពាល់របស់វា។ម្សៅសអាចបណ្ដាលអោយ អ្នកបរិភោគមានអាការៈដង្ហក់ សម្ពាធឈាមធ្លាក់ចុះ ធីងធោង ចុកពោះ ក្អួត រាគ។ ចំពោះមនុស្សដែលងាយនឹងប្រតិកម្ម ឬអ្នកកើតជំងឺហឺត វាអាចបណ្ដាលអោយស្ទះសន្លប់អាចឈានទៅដល់ស្លាប់បាន។ អ្នកលក់ដែលប្រើប្រាស់និងប៉ះពាល់ផ្ទាល់នៅនឹងអាហារមានដាក់ថ្នាំសនេះក៏អាចមានអាការៈដូចគ្នាដែរ។

ម្សៅសនេះត្រូវបានគេប្រើ(យ៉ាងទូលំទូលាយ គ្មានការត្រួតពិនិត្យ) ទៅលើ ទំពាំងជ្រក់ ផ្លែត្នោតខ្ចី ត្រយ៉ូងចេកហាន់រួច ដើមចេកហាន់ស្រាប់ ស្លឹកគ្រៃហាន់ ខ្ញីហាន់ សណ្ដែកបណ្ដុះ ស្កត្នោត និងជូតពីក្រៅផ្លែដូងដែលសកសំបកស្អាត។

តើយើងអាចជៀសវាងសារធាតុនេះបានយ៉ាងដូចម្ដេច?

គួរប្រើស្លឹកគ្រៃ ត្រយ៉ូងចេក ខ្ញី ដើមចេក ដែលហាន់ដោយខ្លួនឯងផ្ទាល់។ ជ្រើសទិញតែសណ្ដែកបណ្ដុះ ស្កត្នោត ផ្លែត្នោត ផ្លែដូង ទំពាំងជ្រក់ ដែលមានពណ៌មិនសពេក។ កាលណាយើងទាំងអស់គ្នារួមគ្នាឈប់ទិញចំណីអាហារដែលប្រើម្សៅសបាន នោះអ្នកលក់ពិតជាឈប់ដាក់មិនខាន ព្រោះដាក់អោយឃើញមានសោភ័ណភាពបានប្រយោជន៍អ្វី បើគ្មានគេទិញផង(បើចាំមានខាងកាំកុងត្រូល ឬសុខាភិបាល ឬក៏កសិកម្ម អភិវឌ្ឍន៍ជនបទ។ល។និង។ល។ មកគិតពីសុខភាពយើងមិនដឹងជា ត្រូវចាំដល់ពេលណាទេsic!)៕

ប្រការគួរធ្វើពេលកូនតូចក្ដៅខ្លួនខ្លាំង

អ្នកម្ដាយទាំងឡាយតែងតែមានការព្រួយបារម្ភនៅពេលកូនតូចក្ដៅខ្លួន។ ក្មេងនៅតូចមិនទាន់មានអង្គបដិបក្ខប្រាណច្រើននៅឡើយទេ ដូច្នេះជាញឹកញាប់ណាស់ នៅពេលមានការប្រែប្រួលអាកាសធាតុបន្តិចបន្តួច ក៏អាចបណ្ដាលអោយគេឈឺបានដែរ។ ខាងក្រោមនេះ គឺជាបទពិសោធន៍ផ្ទាល់ខ្លួនរបស់ខ្ញុំក្នុងនាមជាម្ដាយម្នាក់ សូមចែករំលែកចំណេះដឹងតិចតួចនេះដល់អ្នកម្ដាយថ្មីថ្មោងទាំងឡាយ។

• វាស់កំដៅគេអោយបានញឹកញាប់(រៀងរាល់១៥នាទីទៅ៣០នាទី)ដោយប្រើសីតុណ្ហមាត្រ (Thermometer)។ ការប្រើ Thermometer អាចអោយយើងដឹងយ៉ាងប្រាកដពី កំដៅខ្លួនកូនតូច។ ការស្ទាបដោយដៃទទេរអាចអោយមានការភ័ន្ត ច្រឡំនៅពេលយើងស្ទាបញឹកញាប់។
• សូមចងចាំថា ការដែលក្ដៅខ្លួនខ្លាំងពេកអាចបណ្ដាលអោយក្មេងប្រកាច់បាន។ទោះជាអ្នកប្រើថ្នាំប៉ារ៉ាសេតាម៉ុលក៏កំដៅមិនអាចថយចុះបានភ្លាមៗដែរ។ ដូច្នេះមាតាទាំងឡាយ គួរមានអាល់កុលមួយដបទុកនៅក្នុងផ្ទះ។ យកកំណាត់ជ្រលក់អាល់កុល អោយជោកជូតខ្លួនអោយកូនតូចអាចអោយកំដៅ ក្នុងខ្លួនគេថយចុះបានភ្លាមៗ នៅពេលដែលគេក្ដៅខ្លួនខ្លាំង។ បន្តជូតអោយគេជារឿយៗរហូតដល់ខ្លួនគេចុះត្រជាក់។
• ជាទូទៅថ្នាំប៉ារ៉ាសេតាម៉ុលជាប្រភេទសុលមានប្រសិទ្ធិភាពរហ័សជាងប្រភេទលេប ឬផឹក។ តែសូមជៀសវាងការប្រើថ្នាំលើសកំណត់ព្រោះវាអាចបណ្ដាលអោយក្មេងពុលបាន។ សូមពិភាក្សានឹងគ្រូពេទ្យឬឳសថការីមុនពេលប្រើថ្នាំផ្សេងៗ។
• រកមើលសញ្ញាគ្រោះថ្នាក់ដូចជា៖ កូនតូចសន្លឹម មិនសូវបៅឬញ៉ាំ ក្ដៅខ្លួនខ្លាំងមិនបាត់ក្រោយពេលដាក់ថ្នាំប៉ារ៉ាសេតាម៉ុល។ មើលខ្លួនគេថាតើមានចេញកន្ទួលក្រហមឬទេ។ សូមនាំកូនទៅពេទ្យជាបន្ទាន់កាលណាអ្នកឃើញមានសញ្ញាទាំងនេះ។

សូមអោយកូនតូចរបស់អ្នកម្ដាយរាល់គ្នាមានសុខភាពល្អ ជៀសផុតពីជំងឺទាំងឡាយ។

Happy Birthday My Precious Girl

Happy birthday dear Dany! You’re 7 years old today!

This day …7 years ago, Mummy was struggling to give birth to you, my precious baby.  As I held you in my arms that very first day, I knew I would never let any harm come your way! I looked at your face and wondered who was this little human being? I never imagined that I would love you this much. Thank you so much for let me experience the joy of motherhood.  All I wish is that you grow up to be a fine young lady. I will be a proud mother when you become a good girl to your daddy, a good friend to your friends and a good citizen to your country.

“I will always be there to catch you if you fall” remember this, it is a promise from your Mummy. You are always Mummy’s little princess! I love you, darling!

កំប្លែង៖ អត់បានដេកដដែល

មានបុរសម្នាក់បើកឡានរបស់ខ្លួនត្រឡប់ទៅផ្ទះ ដែលមានចម្ងាយផ្លូវដ៏ឆ្ងាយ។ បន្ទាប់ពីគាត់បានបើកឡានពេញមួយយប់ រួចមកនៅតែមិនទាន់ទៅដល់ផ្ទះទៀត។ដោយសារតែការហត់នឿយបុរសនេះក៏សម្រេចចិត្តចតឡាននៅតាម ចិញ្ចើមថ្នល់ហើយដេកមួយស្របក់ដើម្បីយកកម្លាំងធ្វើដំណើរតទៅទៀត។តែគាត់ពិតជាស៊យមែនព្រោះសម្រាកចំទីក្រុងដែលសម្បូរអ្នករត់ហាត់ប្រាណនៅពេលព្រឹក។ ក្នុងពេលសម្រាកនោះ មានមនុស្សជាច្រើននាក់រត់ហាត់ប្រាណកាត់ឡានរបស់គាត់។បុរសនោះដេកបានមួយភ្លែត ក៏មានអ្នករត់ហាត់ប្រាណម្នាក់មកគោះទ្វារឡានហើយសួរថា “ម៉ោងប៉ុន្មានហើយលោក?” កំពុងតែងងុយដេកផង បុរសនោះក៏ប្រាប់អ្នករត់នោះថា ម៉ោង ៨:១៥នាទីហើយ ហើយគាត់ក៏ដេកទៅវិញទៀត។ បន្តិចក្រោយមកក៏មានម្នាក់ទៀតមកគោះកញ្ចក់ទ្វារគាត់ទៀត ហើយសួរថា “ម៉ោងប៉ុន្មានហើយ លោក?” ។បុរសនោះក៏ឆ្លើយទាំងធុញថា ម៉ោង ៨:២៥នាទីហើយ ហើយក៏ដេកទៀតទៅ។ ដោយសារ តែខ្លាចមានអ្នកមកសួរគាត់អំពីបញ្ហាម៉ោងនេះទៀត បុរសនោះក៏យកក្រដាសមួយសន្លឹកហើយសរសេបិទលើកញ្ចក់ឡានថា “ ខ្ញុំមិនដឹងថាម៉ោងប៉ុន្មានទេ!” ហើយក៏ដេកទៅ ប៉ុន្តែបានបន្តិចស្រាប់តែមានស្នូរគោះទ្វារទៀត។បុរសនោះបានស្ទុះងើបនិងនិយាយដោយមួរម៉ៅថា ខ្ញុំប្រាប់ហើយតើ ថាខ្ញុំមិនដឹងម៉ោងប៉ុន្មានទេ។រំពេចនោះមានសំលេងតបថា មកពីលោកមិនដឹង ហ្នឹងទើបខ្ញុំជួយប្រាប់លោកថា ម៉ោង៨:៤០នាទីហើយ! បុរសបើកឡាននឹកក្តៅក្នុងចិត្តរួចលាន់មាត់ថា អត់បានដេកដដែល!  :twisted:

វិជ្ជាមេផ្ទះ៖ វិធីធ្វើទឹកប្រហុកអោយឈ្ងុយឆ្ងាញ់

សំរាប់ជ្រលក់ជាមួយពោះគោស្ងោរ និង សាច់អាំង

គ្រឿងផ្សំមាន

• ប្រហុកសាច់ (ប្រហុកសៀមរាបត្រីកំភ្លាញ) ១ខាំ
• ក្រូចឆ្មារ ២ផ្លែ
• ស្កស ៥ ស្លាបព្រាកាហ្វ
• រំដេង ១ជ្រុងតូច(ប៉ុនកូនដៃ) បុកអោយម៉ត់
• ខ្ទឹមស ២កំពិសធំ បុកអោយម៉ត់
• គល់ស្លឹកគ្រៃហាន់ ១ចានចង្កិះ
• សណ្ដែកដីលីងតិចឬច្រើនតាមចូលចិត្ត

វិធីធ្វើ

ចិញ្ច្រាំប្រហុកអោយម៉ត់ល្អ ដាក់ស្កសចូល កូររហូតក្លាយជាល្បាយសព្វសាច់ ទើបថែមរំដេងខ្ទឹមស និងច្របាច់ក្រូចឆ្មារដាក់ រួចកូរបន្តទៀត ( បើដាក់ក្រូចឆ្មារចូលមុនស្កសនោះនឹងធ្វើអោយសាច់ប្រហុករឹងដុំៗមិនចូលជាតិសព្វទេ «មានជំនាញហើយក្រោយពីហាត់យុទ្ធសិលិ៍រាប់ដងមិនអស់ »)។ ពេលដែលសព្វហើយ ចាក់ដាំទឹកក្ដៅដាំពុះប្រហែល ១២០ម.ល (បើចូលចិត្តខាប់អាចបន្ថយទឹកក៏បាន) ចូលក្នុងប្រហុកនោះ ទើបថែមគល់ស្លឹកគ្រៃហាន់ និងសណ្ដែកដីលីងចូលជាការស្រេច។

បញ្ជាក់៖ រសជាតិគួរអោយមានជូរ ផ្អែម ប្រៃលាយគ្នា 

សុដាលីន កូនទី២របស់យើង

ដាលីនកូនទី២របស់យើងចាប់កំណើតស្របពេលនឹង មនុស្សស្រីគ្រប់គ្នាចង់បានកូនកើតឆ្នាំជ្រូកមាសដែលកើតមានឡើងតែក្នុងរង្វង់៦០ឆ្នាំម្ដងប៉ុណ្ណោះ។ កាលនោះដានី កូនច្បងរបស់យើង ទើបតែអាយុ២ឆ្នាំ៣ខែប៉ុណ្ណោះ មិនគួរណានឹងឆាប់អោយនាងមានប្អូនទេ ខ្ញុំចង់មានពេលវេលានៅជាមួយនាងអោយច្រើនបន្តិច ប៉ុន្តែចរន្តអ្នកចង់មានកូនកើតឆ្នាំជ្រូកមាសនេះមានច្រើនពេក ធ្វើអោយខ្ញុំជ្រួលជ្រើមចង់បានដែរ ម្យ៉ាងទៀតនោះគិតថាមានកូនទាន់ប្ដីប្រពន្ធយើងនៅក្មេងក៏ម្យ៉ាងដែរ ដល់ចាស់ពេកខ្លាចកូនកើតមកមិនសូវឆ្លាត។

លើកនេះក៏ដូចកំណើតរបស់ដានីដែរ ខ្ញុំគ្មានOvulation ទៀតហើយ ដោយខ្វះhormone ដូច្នេះត្រូវប្រើClomid*ដើម្បីជំរុញអោយអូវុលទុំ(៣វដ្ដឯណោះ ហើយក្នុង១វដ្ដប្រើដល់៣គ្រាប់ដែលជាកំរិតអតិបរិមា)។ ខ្ញុំមិនសង្ឃឹមថានឹងមានផង ព្រោះវាស់កំដៅខ្លួនឯងរកថ្ងៃOvulation មិនឃើញសោះ…. អស់សង្ឃឹមបណ្ដោយ… ហីចុះ… មានតែកូនមួយណឹងក៏តែបានដែរមិនសូវយ៉ាប់ខ្លួន។ ស្រាប់តែបាត់រដូវ១អាទិត្យ…. អីយ៉ា…. រកទិញ Pregnancy test មើលសិន អុញនោះ!!  មានមែន!!! អូ៎ហូ៎ ចាញ់កូនខ្លាំងណាស់គ្រាន់តែបាត់រដូវភ្លាមចាប់ផ្ដើមចាញ់តែម្រ៉ង!! តែលើកនេះបាន គុណថ្នាំបំបាត់អាការៈចាញ់កូន( Prezen*) ជួយ កុំអីគ្មានធ្វើការអីកើតទេ។ អាចថាមកពីមានបទពិសោធពីការមានផ្ទៃពោះលើកមុនផង ទើបខ្ញុំបានត្រៀមលក្ខណៈ ទប់ទល់នឹងអាការៈនេះបានល្អជាងលើកមុន។ លើកនេះក៏ដូចកាលកូនទីមួយដែរ រហូតដល់កូនក្នុងពោះ ចាប់ផ្ដើមកំរើកទើបខ្ញុំបាត់ចាញ់។ ពេលចូលដល់ខែទី៦ ខ្លួនខ្ញុំខ្វះជាតិស្កនិងកាល់ស្យូម ដែលនាំឳ្យខ្ញុំដួលសន្លប់នៅកន្លែងធ្វើការ(ថាសន្លប់ដូចជាមិនត្រូវទេ ត្រចៀកនៅលឺគេស្រែកឈូឆរ តែភ្នែកបើកមិនរួច ដៃជើងក៏ទន់អស់) ហើយក៏ត្រូវគេបញ្ជូនចូលបន្ទប់ សង្គ្រោះបន្ទាន់អោយហឹត Oxygenមួយខ្សឺតពីរខ្សឺតទៅបានដឹងខ្លួន។ គ្រាន់តែរឿងតិចតួចសោះផ្អើលអស់ទាំងប្ដីនិងម៉ាក់ខ្ញុំអោយរត់ត្របាញ់ជើងមកពេទ្យគ្រប់គ្នា(មិនមែនរត់ទេ ការពិតជិះឡានមកតើ!)។ តាំងពីថ្ងៃនោះមកនៅថតតុធ្វើការខ្ញុំតែងមាន Calcium ទុកកាច់ផឹកជាប់រហូត ចំណែកឯបងៗអ្នកធ្វើការជាមួយ អោយតែឃើញអាវីមុខស្លេកគាត់ដេញអោយទៅគេងសំរាកមួយសន្ទុះសិនហើយទើបប្រាប់អោយទៅផ្ទះ។ចូលដល់ខែទី៧ ទី៨ និងទី៩ ខ្ញុំប្រឹងប្រែងហាត់ដើររាល់ថ្ងៃដើម្បីអោយងាយសំរាលជាងកូនមុន។

ថ្ងៃពុធទី២៣ខែមករា ២០០៨៖ ក្រោកពីគេងឡើងម៉ោងប្រហែលជិត៧ព្រឹក ខ្ញុំចាប់ឈឺចង្កេះហើយក៏រាលមកឈឺដល់ពោះ…. ភ្លាមនោះខ្ញុំបានប្រាប់ប្ដីខ្ញុំដែលកំពុងរៀបចេញទៅធ្វើការថា «ខ្ញុំចាប់ឈឺពោះហើយ តែមិនទាន់អីទេ យ៉ាងហោចណាស់ក៏ថ្ងៃត្រង់ដែរទើបឈឺខ្លាំង បងទៅធ្វើការសិនចុះ» (អីយ៉ាមានបទពិសោធន៍ពេញទ្រូងពីកំណើតកូនមុន ទើបប្រាប់ប្ដីយ៉ាងសឿងបឿងបែបនេះបាន) គាត់ផ្ដាំថាពេលណាចាប់ឈឺពោះខ្លាំងហើយ ទូរស័ព្ទប្រាប់គាត់ គាត់នឹងមកវិញភ្លាម! ដោយគ្មានអីធ្វើខ្ញុំក៏គេងមើលទូរទស្សលេងៗជាមួយកូននាង រហូតដល់ថ្ងៃត្រង់ នៅតែមិនទាន់ឈឺខ្លាំង។ ល្ងាចម៉ោង ៥ ហើយពិនិត្យមើលទៅ ស្បូនបើកទើបតែបាន  ២ស.ម… ហ៊ឺម៉េចក៏វិវត្តយឺតម្ល៉េះ? តិចលោមកពីខ្ញុំខ្ជិលពេកមិនព្រមដើរគិតតែពីដេកទេដឹង? មិនបានទេខ្ញុំខ្លាចពិបាកកើតទៀតណាស់ ខ្ញុំក៏ចាប់ដើរជុំវិញផ្ទះ ដើរអស់ចិត្តអស់ចង់ ក៏ញ៉ាំបបរមាន់ តែមានញ៉ាំចូលឯណា បានតែពីរបីម៉ាត់ចាប់ឈឺខ្លាំងបណ្ដោយ។ ម៉ោង៧និង៣០នាទី ខ្ញុំទូរស័ព្ទប្រាប់មីងខ្ញុំថាអោយបិទហាងមកទៅពេទ្យជាមួយខ្ញុំ ( លើកនេះម៉ាក់មិនបានទៅជាមួយទេព្រោះគាត់ត្រូវនៅមើលកូននាង)។ ម៉ោងជិត៨យប់ យើងក៏មកដល់ពេទ្យ ឆ្មបពិនិត្យទៅថាទើបបើកបាន៤ស.ម ក៏ប្រាប់ប៉ាថាអោយប៉ាទៅហូបបាយសិនទៅមិនទាន់កើតទេ ទាល់តែព្រឹកណោះ(ព្រឹកឯណាបើខ្ញុំឈឺខ្លាំងៗហើយណឹង)។ គេពិភាក្សាគ្នាថាបើចង់ឆាប់អោយចាក់ Oxytocine តែខ្ញុំបានប្រាប់ប៉ារួចហើយថាខ្ញុំរៀងចាលនឹង Oxytocine នេះហើយ វាធ្វើអោយឈឺពោះបុកខ្លាំងៗអាក្រក់ណាស់ ឆ្មបក៏មិនហ៊ានចាក់ដែរគឺទុកអោយកើតតាមដំណើរទៅ។ ប៉ាក៏ត្រឡប់មកផ្ទះសិន ឯខ្ញុំក៏ត្រូវប្ដីគ្រាអោយប្រឹងដើរតាមរានហាលអគារសម្ភពបន្តទៀត។ដើររហូតដល់អស់កំលាំងដើរលែងរួចទើបខ្ញុំសុំចូលសំរាកលើគ្រែម្ដង មានអី… គ្រាន់តែខ្នងដល់ពូកចាប់ឈឺពោះយ៉ាងខ្លាំងដល់បែកទឹកភ្លោះ ប្ដីខ្ញុំបីចូលបន្ទប់កើតសឹងមិនទាន់… ខ្ញុំចាប់ឈឺអោយប្រឹងតែ៣ដង កូននូ(នូនូជាឈ្មោះដែលនាងនាងដាក់អោយតាំងពីគេនៅក្នុងពោះ) ក៏កើតចេញស្រែកយំភ្លាមនៅ(ម៉ោង ៩និង២៥នាទីយប់ ថ្ងៃ២៣មករា២០០៨)។ក្រោយពេលឆ្មបជូតសំអាតរួចរាល់ មីងខ្ញុំក៏បីយកមកអោយខ្ញុំមើល។ គ្រប់ដៃគ្រប់ជើងមុខមាត់ក៏ស្អាតល្អ គ្មានចង់បានអ្វីលើសពីណឹងទៀតទេសំរាប់ម្ដាយម្នាក់នេះ After all I am the happiest mom ៕

កំប្លែងចែកគ្នាសើចថ្ងៃអាទិត្យ

ប្រុសៗនិងប្រពន្ធ

ប្រុសៗអត់ប្រពន្ធ អាចមានករណី២ដែលគេយល់ឃើញ

o   បើប្រុសនោះក្រ៖ គេថា «មកពីមិនខំរកស៊ីទើបគ្មានអ្នកស្រលាញ់! ពិតជាប្រុសចោលម្សៀតមែន!»

o   បើប្រុសនោះមាន៖ គេថា «ប្រុសរិះ ខ្លាចមានប្រពន្ធមកដេកស៊ីទ្រព្យអស់!»

ប្រុសៗស្មោះសរមានប្រពន្ធតែមួយមាន២ករណី

o   បើប្រុសនោះក្រ៖ គេដៀលថា «មានប្រពន្ឋតែមួយហើយចិញ្ចឹមមិនចង់រស់ទៀត»

o   បើប្រុសនោះមាន៖ គេថា «មានលុយហើយ មានប្រពន្ធតែមួយ ពិតជាល្ងង់មែន!»

ប្រុសៗមានប្រពន្ធច្រើនក៏មាន២ករណីដែរ

o   បើប្រុសនោះក្រ៖ គេថា «មិនគិតខំរកលុយទេ គិតតែពីរឿងស្រីញីសាវ៉ា! គ្មានកំនើត!»

o   បើប្រុសនោះមាន៖ គេថា «ពួកអាប្រុសៗនេះអោយតែមានលុយមិនបាន គិតតែពីផ្លូវនរក!»

ឳប្រុសៗហើយ ក៏អភ័ព្វម្ល៉េះណ៎!  

ប័ណ្ណជូនពរទិវានៃក្ដីស្រឡាញ់ពីសំណព្វចិត្តខ្ញុំ

ជូនចំពោះស្រ្តីទាំងឡាយដែលនឹងក្លាយជាឧត្តមភរិយា

ជូនចំពោះស្រ្តីទាំងឡាយដែលនឹងក្លាយជាឧត្តមភរិយា

១. បុរសៗតែងស្រឡាញ់ស្រ្តីណាដែលចេះគោរពនិងស្រឡាញ់ក្រុមគ្រួសាររបស់គេ។ ដូច្នេះ ភរិយា ទាំងឡាយគួរចេះយកចិត្តទុកដាក់នឹងសាច់ញាតិរបស់ស្វាមី។

២. ទទួលស្វាគមន៍ស្វាមីដែលនឿយហត់របស់អ្នកជាមួយនឹងស្នាមញញឹមជានិច្ច។ គ្មានស្វាមីឯណាចង់ត្រឡប់មកផ្ទះដែលមានតែភាពធុញថប់ទេ។ស្នាមញញឹមរបស់អ្នកនឹងធ្វើអោយគេនិងកូនៗក៏ដូចជាផ្ទះទាំងមូលស្រស់ថ្លា។

៣. សូមស្ដាប់ នៅពេលដែលគេរៀបរាប់ប្រាប់អ្នកពីការពិបាកដែលគេបានជួបប្រទះក្នុងការងារ របស់គេ។សូមកុំរអ៊ូរទាំពីការពិបាកផ្ទាល់ខ្លួនរបស់អ្នកនៅពេលដែលស្វាមីឈាន ជើងចូលដល់ ក្នុងផ្ទះភ្លាម។អ្នកពិតជាមានរឿងខ្លះដែលចង់និយាយប្រាប់គេ ប៉ុន្តែសូមស្ដាប់នូវអ្វីដែលគេចង់ និយាយជាមុនសិន។ ចំនុចមួយនេះជួយរិតចំណងទាក់ទងរបស់ស្វាមីភរិយាអោយបានល្អប្រសើរ ឡើង។

៤. សូមគោរពនិងផ្ដល់តំលៃគ្នាទៅវិញទៅមក និងមិនត្រូវមើលងាយស្វាមីជាដាច់ខាតប្រសិនបើ អ្នកមិនចង់អោយអាពាហ៍ពិពាហ៍មួយនេះបែកបាក់។មិនត្រូវនិយាយអោយគេបាក់មុខអោយសោះ ជាពិសេសនៅចំពោះមុខអ្នកដទៃនិងមិត្តភក្ដិរបស់គេ។

៥.សូមមានមោទនភាពនឹងស្វាមីរបស់អ្នក ប្រាប់គេថាអ្នកមានសំណាងណាស់ដែលមានគេជាស្វាមី។ បុរសៗ ក៏ដូចជាមនុស្សទូទៅដែរ គេចូលចិត្តការសសើរលើកទឹកចិត្តពីភរិយា។

៦.សូមចងចាំថាស្វាមីរបស់អ្នកត្រូវការមានពិភពផ្ទាល់ខ្លួនរបស់គេ។ ក៏ដូចជាអ្នកដែរ គេមានក្រុមគ្រួសារឪពុកម្ដាយញាតិមិត្ត មិត្តភក្តិជិតស្និទ្ធនិងមិត្តរួមការងារ ដែលទាំងអស់នេះជាចំណែកមួយមិនអាចខ្វះបាននៃជីវិតរបស់គេ។ ដូច្នេះសូមផ្ដល់ឳកាសអោយគេបាននៅជាមួយអ្នកទាំងនោះផង។

រឿងខ្លះៗដែលបុរសជាស្វាមីគួរតែដឹង

(រឿងខ្លះៗដែលបុរសជាស្វាមីគួរតែអាន)

សូមស្រឡាញ់ភរិយាអ្នកទោះជា… ពេលខ្លះនាងប្រចែប្រច័ណ្ឌ ក៏ព្រោះតែនាងស្រឡាញ់អ្នកដែរ (ប្រុសពេញផែនដីតែនាង​បែរជារើសយកអ្នកជាគូជីវិត )

សូមស្រឡាញ់ភរិយាអ្នកទោះជា… ពេលខ្លះនាងរអ៊ូរទាំគួរអោយធុញ ពីព្រោះអ្នកខ្លួនឯងក៏មាន​ទំលាប់អាក្រក់ដែលធើ្វអោយនាងធុញដែរ

សូមស្រឡាញ់ភរិយាអ្នកទោះជា… នាងធ្វើម្ហូបមិនឆ្ងាញ់ ពីព្រោះអ្នកខ្លួនឯងក៏រឹតតែយ៉ាប់ជាង​នាងទៅទៀត

សូមស្រឡាញ់ភរិយាអ្នកទោះជា… ពេលខ្លះនាងហៅអោយអ្នកជួយកូនធ្វើកិច្ចការសាលា ពីព្រោះនាងចង់អោយកូនស្និទ្ធស្នាលនឹងអ្នកប៉ុណ្ណោះ

សូមស្រឡាញ់ភរិយាអ្នកទោះជា… ពេលនាងសួរអ្នកថាតើនាងមើលទៅធាត់ឬទេ?ពីព្រោះនាងគិតថាគំនិតអ្នកសំខាន់ណាស់ ដូច្នេះសូមប្រាប់នាងថា អូនស្អាតហើយ

សូមស្រឡាញ់ភរិយាអ្នកទោះជា… ពេលខ្លះនាងជជែកតវ៉ានឹងអ្នក ពីព្រោះនាងគ្រាន់តែចង់អោយ​អ្នកយល់ពីគំនិតនាងប៉ុណ្ណោះ

សូមស្រឡាញ់ភរិយាអ្នកទោះជា… ពេលនាងប្រាប់អ្នកថាត្រូវបើកឡានដូចម្ដេច ពីព្រោះនាង​គ្រាន់តែចង់អោយអ្នកបើកបរដោយសុវត្ថិភាពប៉ុណ្ណោះ

សូមស្រឡាញ់ភរិយាអ្នកទោះជា… នាងតែងខ្លួនយូរនោះសែនយូរ… ពីព្រោះនាងគ្រាន់តែ​ចង់អោយរូបនាងស្អាតសំរាប់កែវភ្នែកអ្នកប៉ុណ្ណោះ

សូមស្រឡាញ់ភរិយាអ្នកទោះជា… នៅសុខៗ គ្មានរឿងអ្វីសោះស្រាប់តែនាងយំ សូមកុំសួរថា​មានរឿងអ្វី គ្រាន់តែកាន់ដៃនាងហើយប្រាប់ថា”កុំបារម្ភអីអូន អ្វីៗនឹងអាចដោះស្រាយបាន អូននៅមានបងម្នាក់​ដែលយល់ចិត្តអូន”(ទោះពេលខ្លះ អ្នកមិនយល់ពីនាងក៏ដោយ)

សូមស្រឡាញ់ភរិយាអ្នក…. ពីព្រោះក្រៅពីកូនៗ អ្នកជាមនុស្សដែលនាងស្រឡាញ់ជាងគេបំផុត

ភរិយាដែលពោរពេញដោយសុភមង្គល

ប្តីសំឡាញ់

ចាប់តាំងពីពេលរៀបការរហូតមកទល់ថ្ងៃនេះ អូនតែងសសើរនឹងសំណាងខ្លួនឯងណាស់ អូនជាមនុស្សស្រីម្នាក់ដែលមានសុភមង្គលជាងគេក្នុងលោកនេះ។  អូនមានអ្វីៗគ្រប់យ៉ាងដែលនារីក្នុងលោកប្រាថ្នាចង់មាន។ អូនមានស្វាមីដ៏ល្អម្នាក់ បងជាមនុស្សប្រុសដែលមានការទទួលខុសត្រូវខ្ពស់ មិនចេះដើរចោលប្រពន្ធកូន មិនញុំាស្រា មិនមានស្រីញីខាងក្រៅផ្តេសផ្តាសឲ្យអូនពិបាកចិត្តម្ដងណាទេ។ បងផ្ដល់តំលៃដល់ការសំរេចចិត្តរបស់ភរិយា និងតែងតែស្ដាប់យោបល់អូនជាដរាប។លើសពីនេះទៀត បងក៏តែងតែជួយរំលែកភារកិច្ចអូនក្នុងការជួយថែទាំកូន។ បងគឺជាបុរសល្អម្នាក់ ហើយអូនហ៊ាននិយាយថាបងគឺជាឧត្តមស្វាមីរបស់អូន។ ក្នុងមួយជីវិតនេះអូនមិនប្រាថ្នាអ្វីលើសពីនេះទៀតទេ។អូនខំធ្វើបុណ្យបន់ផ្សងសូមអោយបងនៅតែជាស្វាមីដ៏ល្អរបស់អូនជារៀងរហូតតទៅ៕

ពីភរិយារបស់បង

គ្មានចំណងជើង

នឿយហត់យ៉ាងណា បើមានមនុស្សដែលយល់ចិត្តនៅក្បែរ ក៏គង់បានស្បើយ។

ឈឺចាប់ប៉ុនណា បើមានអ្នកជាទីស្រឡាញ់លួងលោមក៏គង់បានរសាយ