ដំណើរទៅក្រុងឡុងដ៍ ខែមេសាឆ្នាំ២០១៨


London ទីក្រុងដែលខ្ញុំមិនដែលធ្លាប់ប្រាថ្នាចង់ទៅ។ កាលឆ្នាំ២០១៨ដែលខ្ញុំបានទៅលេងប្រទេសបារាំង ខ្ញុំក៏នឹកឃើញចង់ទៅលេងប្អូនប្រុសពៅខ្ញុំដែលរស់នៅប្រទេសអង់គ្លេស។ ចិត្តដែលនឹករលឹកប្អូនពៅ ដែលឃ្លាតឆ្ងាយគ្នាអស់៤ឆ្នាំ បានជំរុញចិត្តខ្ញុំឱ្យរៀបចំដំណើរនេះឡើង។

កាលនោះ ពេលដែលប្ដីប្រពន្ធយើងចេញពីភ្នំពេញបានទៅដល់ប៉ារីសហើយ យើងសម្រាក១យប់នៅប៉ារីស នៅជិតនឹងស្ថានីយ៍រថភ្លើងលឿន Gare Paris du Nord។ ដោយសារស្វាមីខ្ញុំ បានកក់សំបុត្ររថភ្លើងរួចហើយតាំងពីភ្នំពេញ រីឯវិសាប្រទេសអង់គ្លេសក៏បានសុំរួចរាល់ ដូច្នេះដំណើរនេះមិនមានការពិបាកប៉ុន្មានទេ។ ម៉ោង៧កន្លះព្រឹកនៅប៉ារីស យើង២នាក់ប្ដីប្រពន្ធឡើងរថភ្លើងល្បឿនលឿន មកក្រុងឡុងដ៍ ដែនដីរបស់ម្ចាស់ក្សត្រី អេលីហ្សាប៊ែតទី២។ រថភ្លើងលូនលឿនសំដៅ ស្ថានីយ៍ King’s cross st Pancras ក្នុងរយៈពេលជាង២ម៉ោង។ យើងបានកក់សណ្ឋាគារនៅម្ដុំស្ថានីយ៍នោះរួចស្រេចតាំងពីភ្នំពេញ ប៉ុន្តែទៅដល់ភ្លាម យើងមិនអាច Check in បាននៅឡើយទេ ដោយសារមិនទាន់ដល់ម៉ោងអាចចូលបាន ដូច្នេះហើយ យើងក៏ផ្ញើសំពាយវ៉ាលីដ៏ធ្ងន់របស់យើងនៅសណ្ឋាគារ រួចទើបចេញដើរលេង។ ស្វាមីខ្ញុំដែលជាអ្នកពេញចិត្តនឹងសកលវិទ្យាល័យ Cambridge ដ៏ល្បីឈ្មោះ បានកក់សំបុត្ររថភ្លើងតំបន់ ចេញពី St Pancras ទៅ Cambridge ក្រុងតូចស្ងប់ស្ងាត់របស់អ្នកសិក្សានោះរួចស្រេចទៅហើយ (ខ្ញុំនឹងរៀបរាប់ពីដំណើរ ទៅ Cambridge នៅពេលណាមួយ)។

តាមការណាត់ ប្អូនពៅខ្ញុំបានមកជួបពួកយើង រួចនាំយើងទាំង២នាក់ប្ដីប្រពន្ធដើរមើលក្រុងឡុងដ៍ ដ៏ស្រស់ឆើតឆាយ។ ក្រោយពេលជួបគ្នា អោបគ្នាយំសារស័ព្ទក្ដីនឹករលឹកចំពោះគ្នាអស់ចិត្ត ខ្ញុំក៏រៀបចំប្រមូលបញ្ញើចំណីហូបឱ្យប្អូនយកទុកដាក់នៅសណ្ឋាគារដែលវាសម្រាកទើបនាំគ្នាចេញទៅដើរមើលក្រុងគេ។ អាកាសធាតុក្រុងឡុងដ៍ ពេលនោះ រងាហើយរលឹមផ្សែងក្រូចឥតដាច់។ ស្វាមីខ្ញុំ ដែលមានតែអាវធំ និងអាវក្នុង២ជាន់ ក៏រងាសឹងទ្រាំមិនបាន ភ្លៀងផង ខ្យល់ត្រជាក់បក់តិចៗមកផង ធ្វើឱ្យយើងដើរកៀកគ្នាស្និទ្ធ លែងខ្មាសប្អូន 😁។

យើងទៅមើលការដើរក្បួនទ័ពការពារនៅមុខ វិមាន Buckingham palace ទាំងភ្លៀងរលឹមឥតដាច់ ជាសំណាងដែរ ដែលពួកយើងមានឆ័ត្រ២។ ប្អូនប្រុសខ្ញុំថា ១ឆ្នាំមាន៣៦៥ថ្ងៃ ស្រុកនេះភ្លៀង៣០០ថ្ងៃហើយ បើចង់បានលេងសប្បាយ ទាល់តែទៅខែ៦ ទើបអន់ភ្លៀង។ តែទោះយ៉ាងណា ភ្លៀងនិងអាកាសធាតុត្រជាក់ស្រេងនេះមិនអាចរារាំងយើងបានទេ បំណាច់នឹងអស់លុយ វិសាផង សំបុត្ររថភ្លើងផង សណ្ឋាគារផង យើងត្រូវតែដើរថតទាំងភ្លៀង 😁។ ចេញពីមុខវាំង Elizabeth the second យើងជិះ Metro ទៅ Westminster Abby ជាវិហារ កន្លែងដែលរាជវង្សអង់គ្លេសរៀបការនៅទីនោះ តែយើងមិនបានចូលទេ ដោយសារពេលយើងមានខ្លីពេក។ យើងទៅញ៉ាំបាយថ្ងៃត្រង់នៅហាងចិនឯត្រើយម្ខាងទន្លេ Thames river ព្រោះប្អូនពៅថា ម្ហូបអង់គ្លេសពិបាកញ៉ាំ។ ចេញពីបាយថ្ងៃត្រង់ យើងទៅមើល និវេសនដ្ឋាននាយករដ្ឋមន្ត្រីអង់គ្លេស រួចក៏ទៅ London Eyes តែយើងអត់បានឡើងជិះកន្ត្រកវិល London Eyes ទេ ដោយសារជួរមនុស្សឈររង់ចាំវែងពេក។ យប់ឡើងក៏ទៅលេង នៅផ្សារអាស៊ី Oxford circuses ញ៉ាំម្ហូបអាស៊ីទៀត។

ព្រឹកថ្ងៃទី២ មុនពេលចេញពីក្រុងឡុងដ៍ដ៏សែនរងា យើងបានទៅលេង Tower bridge ដែលក្មេងៗចំណាំច្រៀង “London bridge is falling down falling down..” ថតរូបបានខ្លះ(រងាពេក មាត់ឡើងស្វាយលែងចង់ថត😂😂) ។

មុននឹងបែកគ្នា ប្អូនពៅជូនត្រឹមស្ថានីយ៍ St Pancras យើងបានលាគ្នាដោយមិនរំពឹងបានជួបគ្នាឆាប់ៗនោះទេ។ ២នាក់ប្ដីប្រពន្ធយើងក៏បានឡើងយន្តហោះពី Heathrow airport សំដៅទៅ អាកាសយានដ្ឋាន Schiphol airport ប្រទេសហូឡង់ ដែលជាទិសដៅបន្ទាប់ក្នុងដំណើរលើកនេះ។ លាហើយ ក្រុងឡុងដ៍ យើងច្បាស់នឹងជួបគ្នាម្ដងទៀត។

Buckingham palace
បានផ្សាយ​ក្នុង កំណត់ត្រាខ្លី | បញ្ចេញមតិ

ដំណើរទៅលេងទ្វីបអឺរ៉ុបដោយចំណាយតិច


ក្នុងដំណើរទៅលេងទ្វីបអឺរ៉ុបកាលពីឆ្នាំ២០១៨របស់ខ្ញុំ ខ្ញុំក៏បានសម្រេចនូវបំណងប្រាថ្នាទៅឃើញស្រុកអឺរ៉ុបនារដូវផ្ការីក ។ ខ្ញុំនឹងរៀបរាប់នៅដំណើរដែលពោរពេញដោយអនុស្សាវរីយ៍គួរឱ្យចងចាំនេះ ទុកដើម្បីរំលឹកនឹកដល់ ជាសុភមង្គលក្នុងចិត្តនៅវ័យចំណាស់ ហើយក៏ដើម្បីជាគន្លឹះបើមានមិត្តអ្នកអានចង់ដឹងពីវិធីដើរលេងស្រុកអឺរ៉ុបកុំឱ្យចំណាយច្រើន។

ដំណើរទៅលេង អឺរ៉ុបកាលពីខែមេសាឆ្នាំ២០១៨ ខ្ញុំបានត្រៀមទុកតាំងពីចុងឆ្នាំ ២០១៧មកម៉្លេះ។ ស្វាមីខ្ញុំដឹងថា ខ្ញុំស្រលាញ់ផ្កា ហើយមានបំណងប្រាថ្នាចង់ទៅលេងប្រទេសខាងអឺរ៉ុបនារដូវផ្ការីក។ ចៃដន្យអី គាត់ឆែកមើលតម្លៃសំបុត្រយន្តហោះលេងៗ ស្រាប់តែឃើញថា Emerate air មានបញ្ចុះថ្លៃយ៉ាងពិសេស សំបុត្រសំរាប់ទៅមកភ្នំពេញ-ប៉ារីស តម្លៃតែ ប្រហែល៦០០ដុល្លាប៉ុណ្ណោះ។ ហិហិហិ ចាំអីទៀត គាត់កក់ភ្លែត ដោយមិនបារម្ភពីរឿងទិដ្ឋាការទេ ព្រោះយើងធ្លាប់បានទៅលេងស្រុកបារាំងម្ដងហើយកាលពីឆ្នាំ២០១៥ ដូច្នេះយើងមិនចាំបាច់គិតច្រើនទេ ការទទួលបានទិដ្ឋាការឬវីសា មិនមែនជាការលំបាកសម្រាប់ពួកយើងទេ។ ក្រោយពេលកក់រួចហើយ យើងចាប់ផ្តើមដាក់ពាក្យសុំវីសា Schengen Visa ពីស្ថានទូតបារាំងនៅក្រុងភ្នំពេញ។ ដើម្បីសុំវីសានោះ តម្រូវឱ្យមានភ្ជាប់សៀវភៅធនាគារដែលមានចំណូលរបស់យើង មានពាក្យសុំនិងអនុញ្ញាតច្បាប់ពីកន្លែងធ្វើការ មានបណ្ណគ្រួសារ សៀវភៅស្នាក់នៅ (បកប្រែជាភាសាបារាំងឬអង់គ្លេស) រូបថត ៥*៥ស.ម មានបណ្ណធានារ៉ាប់រងដែលទិញពីក្រុមហ៊ុនក្នុងស្រុក និង លិខិតអាពាហ៍ពិពាហ៍ប្ដីប្រពន្ធខ្ញុំ និងឯកសារចាំបាច់មួយចំនួនទៀត ដូចជាសំបុត្រយន្តហោះ ទីកន្លែងដែលយើងនឹងស្នាក់នៅពេលទៅដល់(ខ្ញុំកក់សណ្ឋាគារតាមវេប Booking)។ ដោយសារខ្ញុំធ្លាប់ទៅលេងម្ដងកាលពីឆ្នាំ២០១៥ ដូច្នេះខ្ញុំគិតថា អ្នកពិនិត្យឯកសារពួកខ្ញុំនឹងមិនពិបាកក្នុងការសម្រេចចិត្តផ្ដល់វីសាទេ។ តម្លៃវីសា Schengen តាមចាំបានដូចជា ប្រហែល ខ្ទង់៦០ទៅ៧០ដុល្លា។

ក្រោយពេលបាន វីសា Schengen ហើយ ទើបខ្ញុំចាត់ចែងមើលឆែករៀបចំ Itinerary ដំណើរនេះ។ ដោយគិតថា បំណាច់ធ្វើដំណើរ ប្រាំ ប្រាំមួយពាន់គីឡូម៉ែត្រហើយ ហេតុអ្វីមិនសាកសុំវីសា United kingdom ទៅលេងប្អូនពៅដែលរស់នៅទីនោះផង។ ស្វាមីក៏ចាត់ចែងសុំវីសាប្រទេសអង់គ្លេស។ វីសាអង់គ្លេស រៀងពិបាកសាំញ៉ាំបន្តិច វាទាមទារបំពេញឯកសារច្រើនបន្តិច ហើយអស់លុយក៏មិនស្ទើរដែរ ម្នាក់អស់ ២០០ដុល្លាជាង។ ក្រោយបានវីសាអង់គ្លេសហើយ ឃើញថា កាន់កៀកថ្ងៃធ្វើដំណើរហើយ ខ្ញុំចាប់រៀបកម្មវិធី ដំណើរនេះ ដោយចេញពីភ្នំពេញ ដល់ប៉ារីស សម្រាកមួយយប់សិន ក៏រកកក់ដណ្ឋាគារដែលនៅជិតនឹង Gare Du Nord (តម្លៃជាង១០០ដុល្លាក្នុង១យប់ នេះថោកបំផុតហើយ មិនមានសណ្ឋាគារណាថោកដូចនេះទេ នៅម្ដុំស្ថានីយ៍នោះ) ងាយស្រួលព្រឹកឡើងជិះ TGV ទៅអង់គ្លេស។ រួចយើងចាប់ផ្តើមកក់ សំបុត្រ TGV តាមអនឡាញ តម្លៃដូចជាជិត១០០ដុល្លា និងកក់សណ្ឋាគារជាបន្តបន្ទាប់សម្រាប់ការស្នាក់នៅអង់គ្លេស( តម្លៃប្រហែលជា ១០០ដុល្លាជាងដែរតាមចាំ ហើយលើកក្រោយខ្ញុំនឹងនិយាយពីដំណើរទៅក្រុងឡុងនេះម្ដង)។ តាមគ្រោង ក្រោយស្នាក់នៅ London ២យប់ យើងជិះយន្តហោះពី Heathrow airport ពីអង់គ្លេសទៅចុះនៅ Schiphol airport ប្រទេសហូឡង់។ បើមានឱកាស ខ្ញុំនឹងរៀបរាប់ពីដំណើរទៅមើល Tulip Garden Keukenhof ដ៏សែនអស្ចារ្យនេះម្ដង។

ជារួមមក ដំណើរលើកនេះ អ្វីក៏ខ្ញុំកក់ជាមុនដែរ ដើម្បីបានតម្លៃធូរថ្លៃហើយបានទៅច្រើនកន្លែង។ យើងដើររបស់ explorer with plan and low budget។ ខ្ញុំចូលចិត្តការដើរលេងរបៀបនេះ វាចំណាយមិនអស់ច្រើន មានសេរីភាព ចង់ញ៉ាំអីក៏បាន ចង់ចេញឬចូលសណ្ឋាគារវិញពេលណាក៏បាន ខុសពីដើរលេងតាម tour group ដែលតម្រូវឱ្យយើងគោរពម៉ោងពេលរបស់គេ។ ការដើរលេងបែបខ្ញុំនេះ ចំណាយអាចធូរជាងការទៅតាមក្រុមហ៊ុនទេសចរណ៍ ពិតមែនតែមិនបានស្នាក់នៅសណ្ឋាគារថ្លៃៗ គ្មានឡានមកទទួល តែ យើងមានសេរីភាពរបស់យើង យើងអាច Enjoy our quality time together។

ថតពីលើឡានក្រុង២ជាន់ ជិះមើលជុំវិញក្រុង Cambridge
សួនផ្កានៅមុខ Buckingham palace
Rowing pun ជិះទូកមើល College in Cambridge University
បានផ្សាយ​ក្នុង កំណត់ត្រាខ្លី | បាន​បិទ​ការ​បញ្ចេញ​មតិ នៅ ដំណើរទៅលេងទ្វីបអឺរ៉ុបដោយចំណាយតិច

ដំណើរទៅលេង Vienne ប្រទេសបារាំង


Vienne ជាទីក្រុងតូចមួយនៅជើងភ្នំ ភាគខាងត្បូងនៃក្រុងធំ Lyon ប្រទេសបារាំង។ ខ្ញុំបានទៅលេង Vienne ជាលើកទី២ ជាមួយនិង ស្វាមី កាលពីរដូវផ្ការីកឆ្នាំ២០១៨។ ខ្ញុំធ្លាប់បានទៅលេងម្ដងហើយកាលពីឆ្នាំ២០១៥ ក្នុងពេលដែលស្វាមីមានបេសកកម្មទៅប្រទេសបារាំង ប៉ុន្តែកាលទៅលើកមុន យើងគ្រាន់តែបានទៅញ៉ាំបាយថ្ងៃត្រង់ជាមួយលោកគ្រូចាស់របស់ស្វាមីខ្ញុំប៉ុណ្ណោះ។ ថ្ងៃនេះ ខ្ញុំស្រាប់តែនឹកឃើញ ចង់សរសេរទុកជាការចងចាំដ៏ល្អចំពោះដំណើរកាលឆ្នាំ២០១៨នេះ។


កាលឆ្នាំនោះ ខ្ញុំនិងគាត់ ជិះរថភ្លើងល្បឿនលឿន TGV ចេញពី Schiphol Station ប្រទេស ហូឡង់ ពីព្រលឹមម៉ោង ៧ សំដៅមកក្រុង Lyon។ យើងមកដល់ស្ថានីយ៍ Part Dieu នៅថ្ងៃត្រង់។ ក្នុងពេលដែលស្រុកយើងមានអាកាសធាតុក្ដៅហប់នារដូវចូលឆ្នាំ ទីក្រុង Lyon ទាំងមូល គ្របដណ្តប់ដោយអាកាសធាតុត្រជាក់មនោរម្យ ចន្លោះពី ១៦ទៅ១៨ដឺក្រេប៉ុណ្ណោះ។ វាជារដូវផ្ការីកដ៏សែនរម្យនា យើងទាំង២នាក់ចុះពីរថភ្លើង អូសវ៉ាលីសដ៏ធ្ងន់ម្នាក់មួយ ដើរសំដៅទៅរក លោកគ្រូចាស់របស់គាត់ ដែលឈររង់ចាំទទួលយើងនៅស្ថានីយ៍អ្នកដំណើរមកដល់។ លោកគ្រូចាស់ ស្វាគមន៍ពួកយើង ជាមួយស្នាមញញឹមដ៏កក់ក្ដៅ និង ការឱប Bisou តាមបែបប្រពៃណីបារាំង។ ខ្ញុំបានត្រឹម ឈរស្ដាប់ពួកគាត់រ៉ាយរ៉ាប់ពីក្ដីនឹករលឹកចំពោះគ្នាជាភាសាបារាំងប៉ុណ្ណោះ ដោយសារចោលភាសានេះយូរ មិនដែលបានប្រើ ខ្ញុំនៅអាចយល់នូវការសន្ទនារបស់គាត់ទាំង២ ប៉ុន្តែមិនអាចនិយាយឆ្លើយឆ្លងបាន។ ប្រហែលជាឃើញថា ខ្ញុំរងាញ័រញាក់ដោយសារខ្យល់និងភ្លៀងរលឹមផ្សែងក្រូច លោកគ្រូចាស់ ក៏បបួលពួកយើងឱ្យឆាប់ឡើងឡានសំដៅទៅក្រុង Vienne។ ការពិតទៅ មុនចេញមកពី ហូឡង់ យើងបានទាក់ទងគ្នារហូតមក មិនចង់រំខានគាត់មកយកដល់ក្រុង លីយ៉ុង ទេ ព្រោះពួកយើង ចង់ជិះរថភ្លើង train de region ដែលរត់មកក្រុងវីយែនដែរ តែលោកគ្រូចាស់ទទូចហើយទទូចទៀត ថានឹងបើកឡានមកយកពួកយើងឱ្យខានតែបាន។ នៅតាមផ្លូវ លោកគ្រូទទូចឱ្យយើងស្នាក់នៅផ្ទះគាត់ឱ្យបាន១អាទិត្យ គាត់ទុកឡានឱ្យយើងបើកទៅណាតាមចំណង់ចិត្ត ប៉ុន្តែ ដំណើរដែលយើងបានគ្រោងទុករួចហើយនេះ ជួនចំពេលដែលមានកូដកម្មរបស់បុគ្គលិកដឹកជញ្ជូន ធ្វើឱ្យជើងរថភ្លើងឡើងត្រឡប់មកប៉ារីសវិញមានចំនួនតិចមែនទែន។ យើងសំណាងដែលទិញបានសំបុត្រតាមអនឡាញ ដែលត្រូវចេញពីលីយ៉ុងនៅ៣ថ្ងៃខាងមុខ ។ ម៉្យាងទៀត ខ្ញុំត្រូវទៅលេងនឹងម្ដាយមីងដែលរស់នៅ Meyzieu ផងដែរទើប មិនអាចស្នាក់នៅ Vienne បានយូរ។
មកដល់ Vienne យើងឡើងមកផ្ទះគាត់ដែលនៅលើភ្នំតាមផ្លូវឡើងភ្នំដែលកោងទៅឆ្វេងស្ដាំដូចពស់លូន។ ខ្ញុំពុលឡានវិលមុខរកកលចង់ក្អួត។ ប៉ុន្តែ ពេលមកដល់ ទេសភាពដ៏ល្អបែបស្រុកស្រែនៅលើភ្នំ មិនធ្វើឱ្យយើងខកចិត្តទេ ខ្ញុំស្វាងចែស នៅពេលមុខប៉ះនឹងខ្យល់ត្រជាក់ស្រេងនារដូវផ្ការីក។ ផ្ការីកគ្រប់ទីកន្លែង សូម្បីតែស្មៅក៏ដណ្ដើមគ្នាចេញផ្កា ហាក់ដូចស្វាគមន៍ប្ដីប្រពន្ធយើង២នាក់ដែរ។ ក្រោយសម្រាកបាត់ហត់បន្តិច លោកយាយដែលជាភរិយាលោកគ្រូ បានធានាខ្លួនជា មគ្គុទ្ទេសក៍ នាំប្ដីប្រពន្ធយើងដើរលំហែ មើលភូមិករអ្នកស្រុកនៅលើនោះ។ ទេសភាពភូមិស្រុកដ៏ស្ងប់ស្ងាត់សុខសាន្ត នាំឱ្យចិត្តខ្ញុំហាក់បានល្ហែល្ហើយពីការនឿយហត់ប៉ុន្មានថ្ងៃមកនេះដែលបណ្ដាលមកពីការអូសវ៉ាលីសតាំងពីភ្នំពេញមក ឌូបៃ ដល់ប៉ារីសរួចក៏ឡើងរថភ្លើងទៅលេងប្អូនពៅនៅទីក្រុងឡុងដុងដ៍ រួចបន្តបង្ហួសជិះយន្តហោះមកហូឡង់ ទើបជិះរថភ្លើងមកលីយ៉ុងវិញ។ ការមកដល់ វីយែន ហាក់ដូចជាឋានសួគ៌ស្ងប់ស្ងាត់មួយដែលចិត្តខ្ញុំមិនចង់ឱ្យឃ្លាត។យើងទៅមើលកសិដ្ឋាន និងកន្លែងចិញ្ចឹមសេះ ដែលវាជាលើកទីមួយសម្រាប់ខ្ញុំ។ ទិដ្ឋភាពក្មេងៗរៀនជិះសេះ សម្រែក គោ ពពែ ទា ក្ងាន មាន់រងាវ ចៀម ពពែ អ្វីអស់ទាំងនេះហាក់ដូចតន្ត្រីធម្មជាតិកំដរអារម្មណ៍ខ្ញុំយ៉ាងដូច្នេះដែរ។ ក្រោយពីដើរទស្សនាភូមិដ្ឋាននៅទីនោះហើយ យើងក៏មកញ៉ាំអាហារពេលល្ងាចដ៏មានឱជារស ក្រេបស្រាក្រហមនិងលាងមាត់ចុងក្រោយដោយ cheese តាមបែបប្រពៃណីបារាំង។


ដំណើរលំហែរទៅ Vienneនេះ ជាដំណើរប្រកបដោយអនុស្សាវរីយ៍ដែលមិនអាចបំភ្លេចបាន។ ខ្ញុំសង្ឃឹមថា ខ្ញុំនឹងបានទៅជួប Vienne ក្រុងតូចច្រឡឹងនិងស្រស់ប្រិមប្រិយជាថ្មីម្ដងទៀតក្នុងពេលណាមួយមិនខាន។

ផ្ទះលោកគ្រូ មើលពីខាងក្រោយ
វាលចិញ្ចឹមសត្វ
រដូវផ្ការីក វាលស្មៅក៏មានផ្កា
កន្លែងចិញ្ចឹមសេះ

បានផ្សាយ​ក្នុង កំណត់ត្រាខ្លី | 6 មតិ

Bookreview÷ “ម្ចាស់បេះដូង” ដោយ លឹម សន្តិភាព


“អត្ថបទនេះសរសេរឡើងកាលពីខ្ញុំទៅលេងក្រុងបាងកកកាលពីខែមករា តែទើបតែបានយកមកបង្ហោះនៅទីនេះ

រឿងម្ចាស់បេះដូង ប្រលោមលោកបែបយុវវ័យ ដែលមនុស្សវ័យកណ្ដាលដូចខ្ញុំក៏ចូលចិត្តអាន។ រឿងនេះ ខ្ញុំធ្លាប់អានម្ដងរួចហើយកាលពីអ្នកនិពន្ធគាត់ដាក់ឱ្យមើលក្នុងផេករបស់គាត់។ ពេលដែលបោះពុម្ពជាសៀវភៅ ក៏ខ្ញុំទើបតែបានយកមកអានក្នុងពេលដែលខ្ញុំធ្វើដំណើរឆ្ងាយនេះឯង។

រឿងនេះ អ្នកនិពន្ធសរសេរឡើងតាំងពីឆ្នាំ២០០៧ ប៉ុន្តែទើបតែបានបោះពុម្ព នៅឆ្នាំ២០១៩នេះ។ រឿងនេះនិយាយអំពីករុណា ក្មេងស្រីម្នាក់ដែលកំព្រាឪពុក មានតែម្ដាយ នាងជាចៅច្បងនៅក្នុងគ្រួសារ ដែលត្រូវធ្វើជាគំរូឱ្យប្អូនៗជីដូនមួយតូចៗរបស់នាង។ នាងបានចាកចេញពីខេត្តក្រចេះស្រុកកំណើតមករៀននៅភ្នំពេញស្នាក់នៅជាមួយម្ដាយមីងបង្កើត។ នៅភ្នំពេញ ករុណាបានជួបមិត្តល្អៗជាច្រើន។ នាងជាមនុស្សដែលឧស្សាហ៍ព្យាយាម នាងមិនបណ្តោយឱ្យពេលវេលាកន្លងទៅអត់ប្រយោជន៍ទេ ព្រោះនាងដឹងថា ម្ដាយតែមួយរបស់នាង ដាក់ក្ដីសង្ឃឹមយ៉ាងមុតមាំមកលើនាង។ នាងប្រឹងប្រែងរៀនសូត្រ ព្រោះនាងមានមហិច្ឆតាថានឹងរៀនបន្តមហាវិទ្យាល័យច្បាប់។ ជាធម្មតា វ័យជំទង់ ១៦ ១៧ឆ្នាំ នាងជៀសមិនផុតពីមាន Crush បែបយុវវ័យឈាមរាវនោះទេ តែករុណាមិនអាចឱ្យអារម្មណ៍នោះមកបំផ្លាញ គោលដៅក្នុងអនាគតរបស់នាងបានឡើយ។ ក្នុងពេលដែលអ្នកនិពន្ធសរសេរបង្កប់ន័យអប់រំ គាត់មិនដែលភ្លេចពីសីល្ប៍វិធីផ្ទាល់ខ្លួនពិសេសរបស់គាត់នោះទេ គឺស៊កសៀតនូវរសជាតិកំប្លែងតាមរយៈពាក្យពេចន៍សន្ទនារបស់តួអង្គ ដែលធ្វើឱ្យអ្នកអានផ្ទុះសំណើចឥតព្រៀងទុក។ រឿងម្ចាស់បេះដូងនេះ អាចថាស្រាលៗល្មមៗ ស័ក្តិសមសំរាប់អ្នកអានក្មេងៗវ័យចាប់ពី១៣ឆ្នាំឡើងទៅអាចអានបាន។

ខ្ញុំត្រេកអរណាស់ដែលខ្ញុំបានដាក់សៀវភៅរឿងដ៏ពិសេសនេះជាប់តាមខ្លួន សំរាប់ដំណើរផ្លូវឆ្ងាយរបស់ខ្ញុំពេលនេះ។ សៀវភៅនេះ បានជួយកាត់បន្ថយពេលវេលារង់ចាំរបស់ខ្ញុំនៅឯស្ថានីយ៍អ្នកដំណើរ។ បើអ្នកមានគម្រោងធ្វើដំណើរឆ្ងាយ ខ្ញុំសូមណែនាំឱ្យមានសៀវភៅនេះជាប់ខ្លួន ព្រោះវាជាមិត្តជួយអ្នកកុំឱ្យអផ្សុកក្នុងដំណើរផ្លូវឆ្ងាយ។


ឯវំ សុំអនុមោទនា 🥰🥰🥰

សៀវភៅអាចរកទិញបាននៅផេក SP books

https://www.facebook.com/lspbooks/

បានផ្សាយ​ក្នុង កំណត់ត្រាខ្លី | បញ្ចេញមតិ

វិជ្ជាមេផ្ទះ÷ “ភ្លាត្រី សាល់ម៉ុន”


គ្រឿងផ្សំ

សាលាដ

ជីអង្កាម

ជីរណា

ជីវ៉ាន់ស៊ុយ

គល់ស្លឹកគ្រៃហាន់

ខ្ទឹមក្រហម

សណ្ដែកកួរ(តាមចូលចិត្ត)

ត្រីសាលម៉ុន Salmon

ទឹកត្រី កោះកុង

វិធីធ្វើ

រៀបចំលាងហាន់បន្លែឱ្យស្រេច។ ហាន់ត្រីសាល់ម៉ុន ជាដុំៗត្រាំទឹកកកមួយសន្ទុះ។ ទឹកត្រីកោះកុង បុកឱ្យស្រេច តាមចូលចិត្ត ផ្អែមប្រៃជូរហិរ។ យកគ្រឿងផ្សំ មកលាយញាំឡូកឡាក់ ចូលគ្នា ហើយភ្លក្សសាកមើលជាការស្រេច។

បានផ្សាយ​ក្នុង កំណត់ត្រាខ្លី | 1 មតិ

វិធីធ្វើជ្រក់សណ្ដែកបណ្ដុះនិងម្ទេសប្លោក


គ្រឿងផ្សំ
សណ្ដែកបណ្ដុះ ៣០០ក្រាម
ម្ទេសប្លោក សំបកក្រាស់ ៣ផ្លែ ចិញ្ច្រាំម៉ត់រួចស្ងោរ
ខ្ទឹមសចិញ្ច្រាំ ១មើម
តាសក់ផ្អរ ៣ផ្លែ

ដាំទឹក៣៣០ម.ល ឱ្យពុះ រួចដាក់អំបិល១ស្លាបព្រាកាហ្វេកន្លះ ស្ករស១ស្លាបព្រាកាហ្វេ ទឹកខ្មេះ ១ស្លាបព្រាបាយ ខ្ទឹមសចិញ្ច្រាំ ម្ទេសប្លោកចិញ្ច្រាំ ចូលតែម្ដង។ បិទភ្លើងចង្ក្រាន ទើបដាក់ត្រសក់ និង សណ្ដែកបណ្ដុះចូល ទាំងទឹកនៅក្ដៅ (ធ្វើដូច្នេះ ត្រសក់នឹងសណ្ដែកបណ្ដុះនៅស្រួយល្អ)។
លាយឱ្យសព្វ ទុកអោយត្រជាក់ សឹមច្រកចូលក្រឡ ទុកមួយឬពីរយប់ ជូរល្មម ញ៉ាំបានជាមួយត្រីអាំង។

បានផ្សាយ​ក្នុង កំណត់ត្រាខ្លី | បញ្ចេញមតិ

Book Review: ទេវបុត្រសេះស របស់អ្នកនិពន្ធ ហេង ដារី


រឿង #ទេវបុត្រសេះស នេះ ខ្ញុំតាមកក់ តាមបង្ខំអោយអ្នកនិពន្ធចេញជាសៀវភៅ ជិត១ឆ្នាំហើយ😆😆 ដោយសារធ្លាប់បានអាននៅប្លុករបស់គាត់ ហើយឃើញថា វាល្អអានពេក ពិបាកទ្រាំចាំពេលគាត់បង្ហោះម្ដង១វគ្គៗ ឡើងអ្នកអានចង់ភ្លេចសាច់រឿង (អ្នកនិពន្ធធ្វើស៊ីផ្លូវចិត្តពេក)។
បង ហេង ដារី ជំនាញរបស់គាត់ គឺសរសេររឿង បែបកុមារ រឿងបែបវ័យជំទង់ ដូចជា #រឿងលោកស្រីកូន របស់គាត់ជាដើម។ ចំណែកឯ #រឿងទេវបុត្រសេះស នេះដែរ ក្រោយពីអានហើយ ខ្ញុំគិតថា ចាប់ពីអាយុ១៥ឆ្នាំឡើងទៅ អាចអានបានហើយ ព្រោះអ្នកនិពន្ធគាត់សរសេរបែបស្រាលៗ មិនស៊ីជម្រៅអីពេក ជារឿងស្នេហាបែប Cute cute 🥰។ អ្នកនិពន្ធរៀបរាប់ពីតួស្រី ឈ្មោះវីតា ដែលមានចរិក សស្លើតសស្លក់ ដើរបុកនេះបុកនោះបែកមេជើង ធ្លាក់អុកគូតនៅជណ្ដើរ ធ្វើអោយអ្នកអានដូចខ្ញុំ ក្នាញ់នឹងតួស្រីនោះហួស😁😁😁។ និយាយពីសំដីតួស្រីវិញ មិនចេះផ្អែម ១ម៉ាត់មិនឱ្យធ្លាក់ដល់ដី ហើយគប់មកវិញផាំង😅😅😅 សូមកោតសរសើរ អ្នកនិពន្ធចេះប្រសព្វរកពាក្យមករៀបរាប់ អោយខ្ញុំជាអ្នកអានសើចឃឹកម្នាក់ឯងកើត 😂😂។ ហើយនិយាយពីតួប្រុសវិញ ជាពួកម៉ាកនឹងតួស្រីតាំងពីសម័យនៅរៀន តាមតួស្រីអោយស្អិត ចូលចិត្តញ៉ោះឱ្យគេខឹង តែខាងស្រីក៏ខឹងមិនសូវបានយូរ😁😁😁 ។ ខាងប្រុសនោះស្រលាញ់គេណាស់ តែមិនព្រមនិយាយប្រាប់គេទេនៅអូសក្រឡា ទុកអោយខាងស្រី សួរខ្លួនឯង ស្មានខ្លួនឯង ហើយឆ្លើយខ្លួនឯង😂។ មើលទៅ សរសេរច្រើនទៀតមិនកើតទេ វីវរបែកធ្លាយសាច់រឿងអស់ spoiled អ្នកអានក្រោយមិនខានទេ😅🔫។
ជាចុងក្រោយ សូមអោយពិន្ទុ ៩លើ១០ សម្រាប់រឿងនេះ (មិនអោយ១០លើ១០ទេ ព្រោះថា រឿងនេះខ្លីពេកត្រឹមតែជិត ២០០ទំព័រ អានមិនស្កៀបទេ 😁) ។ ដូច្នេះ សម្រាប់រឿងនេះបើអ្នកអានជាមនុស្សចូលចិត្តរឿងស្នេហាបែបកំប្លែង ខ្ញុំសូមណែនាំអោយទិញសៀវភៅនេះយកមកអាន។ អានសៀវភៅដែលផ្ដល់នូវស្នាមញញឹម ដូចជាផ្ដល់នូវសេចក្ដីសុខមួយរយៈពេលសម្រាប់យើងដែរ។

បានផ្សាយ​ក្នុង កំណត់ត្រាខ្លី | បញ្ចេញមតិ

Book Review ប្រលោមលោក Captain បណ្ដូលចិត្ត


#Captainបណ្ដូលចិត្ត និពន្ធដោយ #លឹមសន្តិភាព
រឿងនេះ ជាប្រលោមលោកស្នេហាបែបកំប្លែង។ ខ្ញុំធ្លាប់អានរឿងនេះតាំងពីពេលអ្នកនិពន្ធសរសេរបង្ហោះលើផេករបស់គាត់។ ពេលដែលគាត់សម្រេចបោះជាសៀវភៅ ខ្ញុំក៏នៅតែទិញយកមកអានម្ដងទៀត ដោយសារតែជាប់ចិត្តនឹងរឿងនេះខ្លាំងពេក។

សម្រាប់អ្នកដែលចូលចិត្ត រឿងបែប #Comedy #romance ខ្ញុំណែនាំអោយជ្រើសអានរឿងនេះ។ អ្នកនិពន្ធមានរបៀបរៀបរាប់សាច់រឿងរបស់គាត់ដែលធ្វើអោយយើងអានហើយជក់អារម្មណ៍មិនអាចដាក់សៀវភៅនេះចុះពីដៃបាន។ ឈុតណាដែលកំប្លែងៗ cute cute យើងអ្នកអានក៏ចូលតួ ញញឹមញញែមពេញចិត្តម្នាក់ឯង😁😁។ រឿងនេះ និយាយពីនារីម្នាក់ធំធាត់មកពីមណ្ឌលកុមារកំព្រា នាងជានារីដែលពោរពេញដោយភាពជឿជាក់លើខ្លួនឯង និងក្លាហានសមជាស្ត្រីសម័យថ្មី។ ដើម្បីសម្រេចបំណងប្រាថ្នារបស់ខ្លួន តួអង្គឯកក្នុងរឿងនេះ ត្រៀមខ្លួន set goals ច្បាស់លាស់ក្នុងជីវិតរបស់នាង ហើយប្រឹងប្រែងដើម្បីអោយបានទៅដល់គោលដៅរបស់នាង។ ក្រៅពីនេះ រឿងនេះក៏លេចធ្លោខុសពីរឿងផ្សេងៗ ត្រង់អ្នកនិពន្ធខិតខំរំលេចសារថា មនុស្សប្រុសដែលនាងអាចផ្ញើវាសនាអនាគត គឺមនុស្សដែលអោយតម្លៃនាង យកចិត្តទុកដាក់នឹងនាង មិនមែនជាមនុស្សប្រុសដែលអាងអំណាចផ្ដាច់ការ មិនទុកសិទ្ធិអោយនាងដើម្បីជ្រើសរើសផ្លូវជីវិតដែលនាងចង់បាននោះទេ។ ប្រសិនបើអ្នកអានគ្រាន់អានបែបជាការកំសាន្តអារម្មណ៍ គេនឹងយល់ថារឿងនេះគ្រាន់តែមានរសកំប្លែងលាយឡំនឹងស្នេហា មិនបានចាប់អារម្មណ៍ដល់អត្ថន័យអប់រំក្នុងរឿងនេះទេ។ តែបើយើងវិភាគបន្តិចទៅ យើងក៏នឹងឃើញថារឿងនេះ ពិតជាមានសារអប់រំល្អៗដល់មិត្តអ្នកអាន ដូចដែលខ្ញុំបានរៀបរាប់ខាងលើ។ ចំណុចល្អៗទាំងអស់ខាងលើនេះជាអ្វីដែលខ្ញុំចង់ឃើញ និងកំពុងអប់រំកូនដោយសង្ឃឹមថា កូនៗនឹងធំធាត់ប្រកបដោយភាពជឿជាក់ និងហ៊ានសម្រេចជោគវាសនាអនាគតកូនដោយខ្លួនឯង ហើយខិតខំដើម្បីសម្រេចគោលដៅដែលកូនប្រាថ្នា។
រឿងប្រលោមលោក #Captainបណ្ដូលចិត្ត នេះ ជារឿងដែលកំពុងពេញនិយមក្នុងចំណោមយុវជនដែលនិយមអានប្រលោមលោក ហើយខ្ញុំសូមចាត់ទុកសៀវភៅមួយក្បាលនេះ ចូលក្នុងប្រភេទសៀវភៅ Highly recommend ដែលអ្នកគួរតែរកទិញអាន។
ដោយក្ដីស្រឡាញ់
សុជីវី

បានផ្សាយ​ក្នុង កំណត់ត្រាខ្លី | បញ្ចេញមតិ

Book Review: សៀវភៅ ខ្ញុំខុសគេ របស់ សុទ្ធ បូផា


#ខ្ញុំខុសគេ រឿងនិទានពីជីវិត សុទ្ធ បូផា
ការពិត ខ្ញុំគ្មានគម្រោងទិញសៀវភៅនេះទេ ព្រោះខ្ញុំមិនមានចំណូលចិត្តនឹងអានរឿងជីវិតពិតប៉ុន្មានទេ។ តាំងពីដើមរៀងមក ខ្ញុំជាចៃប្រលោមលោក 😁😁😁។ តែជាចៃដន្យល្អ បង លឹម សន្តិភាពអ្នកនិពន្ធពឹងអោយខ្ញុំជួយទទួលសៀវភៅនេះផងដើម្បីចាត់ចែងផ្ញើអោយគាត់ទៅកាណាដាក្នុងពេលឆាប់ៗនេះ ដូច្នេះហើយ រឿងអ្វីដែលខ្ញុំមិនឆ្លៀតអានវាមុននឹងបញ្ជូនទៅបងភាពនៅឯ កាណាដានោះ 😁😁។

អ្នកនិពន្ធ និទានពីជីវិតសោករបស់គាត់ អានកន្លែងខ្លះ ខ្ញុំក៏ខ្សឹកខ្សួល នឹកខ្លោចចិត្តដែលគាត់ក្មេងយ៉ាងនេះ ម៉េចបានទទួលការរ៉ាប់រងមើលថែម្ដាយគាត់តែម្នាក់ឯងបាន? គាត់អស្ចារ្យណាស់ គាត់ដូចជាផ្កាដែលដុះលើថ្ម ដែលគ្មានអ្នកថែតែនៅតែអាចប្រឹងប្រែងលូតលាស់ដោយខ្លួនឯងកើត។ ប៉ុន្តែទន្ទឹមនឹងនោះ គាត់ដូចជាជាប់ចំណង ដែលរើខ្លួនមិនរួច។
គាត់មានសីល្ប៍វិធីពិសេសមួយរបស់គាត់ គឺក្នុងពេលដែលគាត់និទានពីរឿងកំសត់ ហេតុអ្វីក៏ខ្ញុំនៅតែអាចសើចបានទាំងខ្ញុំកំពុងខ្សឹកខ្សួល? របៀបសរសេររបស់គាត់ គួរអោយស្ងើចសរសើរណាស់ គាត់សរសេរពាក្យសាមញ្ញៗ ងាយយល់ រៀបរាប់បញ្ហាក្នុងបេះដូងរបស់គាត់។ ទោះគាត់កំពុងខឹងនឹងបងៗដែលមិនយល់ចិត្តគាត់ គាត់ក៏នៅប្រើភាពវាងវៃរបស់គាត់ ដើម្បីវែកញែកថា រឿងគ្រប់យ៉ាង អាចមិនមែនដូចដែលគាត់គិត។ គាត់លើកឃ្លាមួយថា”ពេលដែលយើងខឹងស្អប់គេ យើងនឹកឃើញតែចំនុចអាក្រក់។ ចំនុចល្អដែលគេមាន ដូចលុបបាត់អស់ហើយ។ ហើយការគិតពិចារណា ក៏លែងដឹងខុសត្រូវទៀតដែរ។”

ជាចុងក្រោយ ខ្ញុំសូមវាយតម្លៃថា សៀវភៅនេះ “are highly recommended to read” ជាសៀវភៅដែលមិនគួរមើលរំលង។ ទោះជាបានអានរួចហើយក៏ដោយ ខ្ញុំនឹងទិញវាមួយ យកមកទុក ជា Collection ឬដើម្បីទុកអោយកូនៗខ្ញុំបានអានស្នាដៃដ៏ល្អនេះរបស់ សុទ្ធ បូផា(ផ្កាយដុះកន្ទុយ)។
ដោយការកោតសរសើរអស់ពីចិត្ត
សុជីវី

បានផ្សាយ​ក្នុង កំណត់ត្រាខ្លី | 2 មតិ

ដំណើរទៅលេងក្រុងសេអ៊ូល÷ Explore trip


ខ្ញុំសរសេរអត្ថបទនេះ ពេលដែលខ្ញុំនៅលើយន្តហោះត្រឡប់មកពីក្រុងសេអ៊ូលវិញ។ ដំណើរលើកនេះ ជាដំណើរបែបមានកូនតូចធំ ជាប់ដៃរយីងរយោង ដំណើរបែប Family trip និង បែប relaxing គេចពីកំដៅដ៏សែនក្ដៅនៃរដូវចូលឆ្នាំខ្មែរ។ នៅលើយន្តហោះ ខ្ញុំស្រាប់តែនឹកឃើញចង់ចែករំលែករបៀបដើរលេងដល់អ្នកដែលមានកូន ហើយចង់ដើរលេងរបៀបគ្រួសារ គឺមិនមែនដើរតាមក្រុម Tour ដែលដើរដូចគេរត់ប្រណាំង ហត់ជាងនៅផ្ទះ ហើយត្រូវបានគេយកទៅដាក់តាមហាងលក់ទំនិញស្ដាប់គេប្រូផលិតផលទៀត។

ដើម្បីទៅលេងសេអ៊ូល ទីក្រុងដែលមានការចំណាយខ្ពស់ ស្អីក៏ថ្លៃ របស់សព្វមុខថ្លៃ (របស់ញ៉ាំក៏មហាសែនថ្លៃ គឺថ្លៃជាងទំនិញស្រុកអឺរ៉ុបជិត៣ដង) យើងត្រូវមានផែនការច្បាស់លាស់បន្តិច។ ជាពិសេស បើយើងប្រាថ្នាទៅរដូវផ្ការីក ត្រូវរៀបចំផែនការអោយបានមុនបន្តិច ព្រោះជា High season ដែលអ្វីគ្រប់យ៉ាងមានតម្លៃថ្លៃ ព្រោះមនុស្សម្នា ទៅដើរលេងច្រើន។
ជាដំបូង ខ្ញុំកក់សំបុត្រយន្ដហោះជាមុន ដោយជ្រើសរើសទៅតាមហុងកុងព្រោះវាមានតម្លៃធូរជាងហោះផ្ទាល់ទៅសេអ៊ូល។ ខ្ញុំកក់សំបុត្រ២ខែមុនចេញដំណើរ ដោយទៅតាមហុងកុង អស់ម្នាក់ប្រហែល៤០០ដុល្លាជាងបន្តិច នៅពេលដែលការហោះផ្ទាល់ពីភ្នំពេញទៅចំណាយអស់ប្រហែលម្នាក់៦០០ដុល្លាជាង។ ឃើញទេ? ខ្ញុំចំណេញម្នាក់ប្រហែល២០០ដុល្លា អ៊ីចឹង គ្នាខ្ញុំ៥នាក់ ចំណេញ១០០០ដុល្លាស្រេចហើយ។ ម៉្យាងទៀត ការដូរជើងយន្តហោះនៅហុងកុង ដោយសារខ្ញុំចង់បង្រៀនកូនអោយចេះ ពីរបៀបដូរជើងយន្តហោះ ថាគេធ្វើអីខ្លះ គេមើលអីខ្លះដើម្បីរកពត៍មានរបស់ជើងហោះហើរនិងរក gate ដើម្បីឡើងយន្តហោះ។

ជំហានបន្ទាប់ ត្រូវគិតពីកន្លែងស្នាក់នៅ។ ក្រោយពេលទទួលបានវីស្សាទៅប្រទេសកូរ៉េហើយ ខ្ញុំ កក់កន្លែងស្នាក់ ដោយជ្រើសកក់តាម website Agoda ហើយជ្រើសយក Agoda home ជារបៀបផ្ទះស្នាក់ whole apartment, one unit។ យើងក៏អាចរកផ្ទះស្នាក់របៀបនេះ នៅតាម Airbnbបានដែរ តែខ្ញុំជ្រើសរើសយក Agoda ដោយហេតុថា ខ្ញុំស៊ាំនឹងរបៀបកក់របស់វា ដោយធ្លាប់កក់អូតែលតាមវេបវាញឹកញាប់ ហើយមិនដែលមានបញ្ហាអី លក្ខខណ្ឌវាងាយៗ ស្រួលយល់។ ការកក់កន្លែងស្នាក់នេះ Agodaតែងតែកាត់លុយយើងមុន ដូច្នេះទាមទារអោយយើងមាន VISA Card។ ហេតុដែលខ្ញុំជ្រើសរើសយកផ្ទះស្នាក់ ព្រោះផ្ទះស្នាក់វាផ្ដល់ភាពងាយស្រួលជាងស្នាក់នៅសណ្ឋាគារ យើងមានអារម្មណ៍ថាដូចនៅផ្ទះយើង ហើយផ្ទះមួយនោះមាន២បន្ទប់ មានបន្ទប់ទទួលភ្ញៀវមួយដែលអាចអោយកូន២នាក់គេងបាន ព្រមទាំងមានមានផ្ទះបាយដែលខ្ញុំអាចចំអិនម្ហូបបាន។ ផ្ទះស្នាក់មានតម្លៃធូរជាង សណ្ឋាគារ ដោយផ្ទះមួយទាំងមូល គេងបាន៥នាក់ តម្លៃ១យប់ចន្លោះពី៧០ដុល្លាទៅ១៥០ដុល្លា នៅពេលដែលស្នាក់នៅសណ្ឋាគារ សម្រាប់២បន្ទប់ ខ្ញុំត្រូវចំណាយយ៉ាងហោចណាស់ ២០០ ទៅ៣០០ដុល្លាក្នុង១យប់។ កន្លែងស្នាក់នៅ គួររើសយកកន្លែងក្បែរៗ Public transport ដើម្បីងាយស្រួលធ្វើដំណើរទៅមកចល័តក្នុងក្រុង។

ចុងក្រោយ ត្រូវគិតពីមធ្យោបាយធ្វើដំណើរក្នុងក្រុងសេអ៊ូល÷ ក្នុងក្រុងសេអ៊ូល មធ្យោបាយធ្វើដំណើរដែលងាយស្រួល គឺជិះ មេត្រូនិងឡានក្រុង។ តាក់ស៊ីចំណាយច្រើនបន្តិច ហើយបើមានកូនបីដូចខ្ញុំ ម៉ែឪ២នាក់ទៀត មិនអាចជិះតាក់ស៊ីអាតូចបានទេ ត្រូវជិះអាធំ Jumbo taxi ដែលមានតម្លៃថ្លៃជាងជិះតាក់ស៊ីធម្មតា។ ដូច្នេះហើយទើបខ្ញុំជិះតែមេត្រូ ម្យ៉ាងមេត្រូ មានច្រើនខ្សែក្នុងក្រុងសេអ៊ូល ៩ខ្សែក្នុងក្រុង និងមាន line ទៅក្រៅក្រុងច្រើនទៀត។ ដើម្បីងាយស្រួលក្នុងការប្រើ Public transport យើងគួរទិញកាត Tmoney ដែលជាប្រភេទកាតបញ្ចូលលុយមុន រួចឆូតស្គែននៅពេលយើងចូលក្នុងស្ថានីយ៍មេត្រូ។ កាតនេះ ថែមទាំងអាចប្រើទិញឥវ៉ាន់នៅតាមហាងទំនិញ Seven Eleven CU Cs25។ អ្នកអាចរកទិញកាតទាំងនេះនៅតាម ហាង convenient store ឈ្មោះ CU ក្នុងកន្លែង Arrival hall ក្នុងអាកាសយានដ្ឋាន Incheon ឬមួយទិញពីទូដែលដាក់នៅឯស្ថានីយ៍មេត្រូ។

បន្ថែមពីចំណុចសំខាន់ទាំងបីខាងលើ សេវ៉ា Internet ជារឿងមិនអាចខ្វះបាននៅសម័យនេះ។ ពេលទៅដល់អាកាសយានដ្ឋាន មានបញ្ជរជួលដុំ WiFi ជាច្រើន យើងអាចជួលក្នុងតម្លៃ ចន្លោះពី៣០០០វ៉ុនទៅ ៥០០០វ៉ុន ក្នុងមួយថ្ងៃ។ ដើម្បីជួល យើងត្រូវមានកាត VISA ដើម្បីគេកក់ទុកករណីយើងមិនយកដុំ WiFi សងគេវិញ😁 គេ ក៏ទារស្គែន Passportយើងផងដែរ។ ឬមួយម៉្យាងទៀតយើងអាចទិញស៊ីមកាតក៏បាន តែស៊ីមកាតប្រើបានតែទូរស័ព្ទ១ទេ ដូច្នេះហើយ ប្រើដុំ WiFi ចំណេញជាង។

ចំណុចទាំងប៉ុន្មាន ខាងលើនេះ គឺខ្ញុំរៀបរាប់ត្រួសៗដើម្បីសម្រួលការស្នាក់នៅនិងដើរលេងរបស់យើងនៅក្រុងសេអ៊ូល។ បើមានពេល ខ្ញុំនឹងសរសេរលំអិតម្ដងទៀតពីកន្លែងដែលគួរទៅលេងក្នុងសេអ៊ូល។

********

***បានបញ្ចប់អត្ថបទ និងកែសម្រួល រួចរាល់ក្រោយពេលមកដល់ផ្ទះដេកឆ្អែតហើមភ្នែក***

បានផ្សាយ​ក្នុង កំណត់ត្រាខ្លី | 9 មតិ