វិជ្ជាមេផ្ទះ៖ ឆ្នាំងភ្លើង យ៉ាហន(ឬចៅហន)

ខ្ញុំសូមស្វាគមន៍ឆ្នាំថ្មី ជាមួយវិជ្ជាមេផ្ទះ គឺឆ្នាំងភ្លើងយ៉ាហន។ មុខម្ហូបមួយមុខនេះ សាកសមសម្រាប់កម្មវិធីជួបជុំក្នុងគ្រួសារ​ ជប់លៀងតូចធំបាន ឯវិធីធ្វើមិនជាពិបាកទេ គ្រាន់តែត្រូវការពេលយូរបន្តិចដើម្បីរៀបចំ។

ជាដំបូង ខ្ញុំសូមរៀបរាប់នូវគ្រឿងផ្សំ

គ្រឿងផ្សំទឹកឆ្នាំងភ្លើង

ដូងពូតរួច ប្រហែល៣លីត្រ

ខ្ទឹមស ក្រហម និង​រំដេង លីងអោយឈ្ងុយ រួច​បុកអោយបែកល្អិត

គ្រឿងសាតេ ២កញ្ចប់

ស្ករស

អំបិល និងទឹកត្រី

ទឹកក្រូចឆ្មារ កន្លះចានចង្កឹះ

ឆ្អឹងជ្រូក ស្ងោររម្ងាស់ស្រេច

របៀបធ្វើទឹកឆ្នាំងភ្លើង

ចាក់ទឹកដូងដែលពូតហើយ ចូលក្នុងឆ្នាំងឆ្អឹងស៊ុបដែលបានរម្ងាស់ហើយ រួចដាំអោយពុះ

ទើបថែមខ្ទឹមនិងរំដេងលីង គ្រឿងសាតេ អំបិល ស្ករស ទឹកត្រីចូល ដល់ពុះសព្វ ថែមទឹកក្រូចឆ្មារ ភ្លក្សមើលអោយមានជាតិប្រៃផ្អែមជូរ ទើបបិតភ្លើងទុកមួយឡែក។

គ្រឿងផ្សំសម្រាប់ពិសារ

ត្រកួនឆាករួច

ជីរគ្រប់មុខ

សណ្ដែកបណ្ដុះ

សាច់ត្រីឆ្ដោរ សាច់គោ បង្គារ មឹក(តាមចូលចិត្ត)

នំបញ្ចុក

ដល់ពេលរៀបចំទទួលទាន ដាក់ទឹកឆ្នាំងភ្លើងដាំពុះ ទើបចាប់ស្រុះសាច់បន្លែ តាមចូលចិត្តរួចស្រូបទឹកដូចទឹកនំបញ្ចុក ដាក់ចូលមាត់ ជាការស្រេច  😀 😀 😀 ៕