ថ្ងៃនេះ ខ្ញុំចង់និយាយពីចំនុចអវិជ្ជមានខ្លះដែលខ្ញុំបានជួបនៅផ្សារកំពតកាលពីពេលដែលខ្ញុំបានទៅលេងបូកគោនោះ។ ការដែលនិយាយនេះ គឺមិនមានចេតនាវាយប្រហារអីនោះទេ ក្នុងនាមអ្នកទេសចរម្នាក់ ខ្ញុំគ្រាន់តែសង្ឃឹមថានឹងមានការកែប្រែក្នុងផ្លូវវិជ្ជមានដើម្បីជំរុញវិស័យទេសចររបស់ខេត្តនេះ។
ពេលចុះពីភ្នំមកវិញ គ្រួសារយើងបានសំរេចទៅលេងបន្តនៅរមណីយដ្ឋាន«ទឹកឈូរ» ដោយចង់ទិញគ្រឿងសមុទ្រខ្លះទុកផ្ញើអ្នកផ្ទះ យើងក៏ចូលផ្សារកំពតសិនមុនទៅទឹកឈូរ។ ដើរចូលដល់កន្លែងលក់គ្រឿងសមុទ្រ អ្នកលក់រាក់ទាក់ហៅទិញរបស់គេគ្រប់គ្នា ខ្ញុំចង់ទិញក្ដាមសេះក៏សាកសួរមួយកន្លែងហើយមួយកន្លែងទៀត តែរកក្ដាមដែលធាត់ល្អមិនបានសោះ(ម៉ាក់ខ្ញុំជាអ្នកស្រុកកំពតដែរ ទើបចេះមើលក្ដាមណាធាត់ក្ដាមណាស្គម) ដើរដល់កន្លែងមួយនោះបានឃើញក្ដាមធាត់ៗល្អណាស់ ទំនងទើបយកមកដល់ហើយ។
ខ្ញុំសួរថ្លៃ
អ្នកលក់ឆ្លើយថា៖ ៣៥០០០៛/គីឡូ
ខ្ញុំក៏តថ្លៃអោយ ថា៖ ២៥០០០៛បានទេ?
អ្នកលក់៖ ដាច់ហើយ អត់ចុះទេ
ខ្ញុំ៖ មើលចុះតិចទៀតលមើល
អ្នកលក់មិនខ្ចីតបទេ (ឬកឡូយអស់ទាស់) ដល់ចឹងទៅ ខ្ញុំក៏ដើរហួសទៅកន្លែងមួយទៀត ទាំងចិត្តស្ដាយដែរ ព្រោះក្ដាមនោះពិតជាល្អមែន គិតថាបើម៉េចម៉ាចាំមកសួរម្ដងទៀត។ កំពុងសូរមើលកន្លែងមួយថ្មីហើយ តែក្ដាមដូចជាស្គមៗមិនសូវថ្មីទេ ស្រាប់តែអ្នកលក់អំបាញ់ម៉ិញ ស្រែកហៅអោយទៅយករបស់គេវិញ (ទាំងដែលមុននេះបន្តិច គេមិននិយាយជាមួយខ្ញុំផង)
ខ្ញុំសួរថា៖ ហៅយកហ្នឹងតំលៃប៉ុន្មាន?
អ្នកលក់៖ ចុះអំបាញ់ម៉ិញអោយប៉ុន្មាន?
ខ្ញុំថា៖ ២៥០០០៛
ស្រាប់តែគេចាប់ក្ដាមភ្លែតដាក់ថង់វិបៗៗៗ
ខ្ញុំថា៖ ឈប់ៗ ចាំខ្ញុំរើសខ្លួនឯង
អ្នកលក់ចាប់តម្លើងសម្លេងដាក់ខ្ញុំ៖ មិនបាច់ភ័យទេ គេរើសអោយ មិនខុសទេ
ខ្ញុំ៖ ខ្ញុំចេះរើសហើយ ហីចុះក្ដាមហ្នឹងសើមៗ ដូចមិនមែនក្ដាមអំបាញ់ម៉ិញចឹង? (ក្ដាមដែលខ្ញុំតថ្លៃ វាស្ងួតព្រោះគេទើបយកមក នៅក្នុងសំណាញ់នៅឡើយទេ) ឈប់ៗ! ចាំខ្ញុំរើសខ្លួនឯង
ខ្ញុំមិនទាន់ព្រមថាម៉េចផង អ្នកលក់ ទម្លាក់ថង់ដែលគេបានរើសក្ដាមដាក់ដោយចិត្តគេចោល រួចបោកភូសនៅនឹងមុខខ្ញុំ ចាក់ក្ដាមដែលនៅសល់ប៉ុន្មានក្នុងចានដែកមួយទៀតដែលមានទឹកពេញ
អ្នកលក់៖ មានក្ដាមឯណាដូរលឿនម៉េះនោះ!!! ហ៎ក ចង់រើស រើសទៅ!!!
ហាក!!! អោយរើសយ៉ាងម៉េច!!! បើក្ដាមនៅក្នុងទឹក អត់ចងចំណងទៀត ហ៊ានតែលូក ពិតជាក្ដាមកៀបដាច់ដៃមិនខានទេ។ បោកថង់ក្ដាមភូសនៅមុខហើយ ចាំតែថោកនៅទិញទៀតតើស!!! មិនចេះឈ្លោះ ខ្ញុំក៏ដឹកដៃម៉ាក់ដើរចេញទៅ។ ឱ!!! មីងអ្នកលក់ហ្នឹងបែបគាត់រកស៊ីតែរបៀបហ្នឹងហើយ។
ចេញពីផ្សារកំពត យើងក៏បកមកទឹកឈូរវិញ។ រឿងទៅលេងទឹកឈូរ គឺត្រូវអរគុណដល់ព៌តមានដែលបានពីពូស្រុកស្រែ ក្រោយពីអានប្រកាសគាត់ រមណីយដ្ឋានទឹកឈូ នាខែតុលា ឆ្នាំ២០១២ នេះ….ថាទឹកឈូរមានទឹក យើងក៏សំរេចចូលទៅអើតមើលក្រែងលោមានទឹក អោយក្មេងៗចុះលេង។ ដូចពូស្រុកស្រែប្រាប់មែន ចូលទៅបង់លុយថ្លៃចូលមួយសារ ៥០០០៛ ទៅដល់ចូលចតឡានត្រឹមត្រូវបង់២០០០៛ទៀតថ្លៃចំណតឡាន តូបអង្គុយនៅមាត់ទឹកថ្លៃ ១៣០០០៛ទៀត គឺគេយកតាមជំនាញចឹងទៅ។ ចំណីហូបចុកនៅទីនោះមិនថ្លៃប៉ុន្មានទេ យើងបានកំម្ម៉ងក្ដាមឆាម្រេចខ្ចី មួយចានធំគួរសម ថ្លៃ៤០០០០៛។ អ្នកលក់ដូរនៅទីនោះ រួសរាយរាក់ទាក់ណាស់ ណាមួយគ្នាលក់មិនសូវដាច់ផងមើលទៅ ទើបខំយកចិត្តភ្ញៀវណាស់ដែរ។ បរិស្ថានតំបន់នោះប្លែកឆ្ងាយពីកាលជាងដប់ឆ្នាំមុនណាស់។ កាលនៅពីតូចដែលខ្ញុំធ្លាប់ទៅលេង ទឹកឈូរថ្លាឈ្វេង ហូររហ៊ឹម ត្រជាក់ដល់បេះដូង តែពេលនេះ ទឹកលែងស្អាតហើយ ទឹកហូរមកមានលាយប្រេង ឯមាត់ច្រាំងចុះទៅពោរពេញដោយសម្រាមនិងមានទឹកហូរ (ប្រហែលទឹកលូទេដឹង???) បង្ហូរចុះទៅកាន់ទឹកឈូរ។ ខ្ញុំឃើញមានការដាក់ធុងសំរាមដែរ តែមិនមានក្រុមចាំសំអាតទេ (តាមសំដីអ្នកលក់ដូរថា មួយមើលបំណាំមួយ មានតែអ្នកយកលុយ តែគ្មានអ្នកសំអាត) ភ្ញៀវខ្លះបោះសំរាម សំបកដប នៅតាមផ្លូវចុះទៅលេងទឹក។ យើងបានចាកចេញពីរមណីយដ្ឋានទឹកឈូរទាំងអារម្មណ៍អាល័យ ស្ដាយសម្រស់ធម្មជាតិដែលត្រូវបានមនុស្សបំផ្លាញទៅហើយ៕
បញ្ចាក់៖ មិនមានរូបថតមកបង្ហាញទេ ព្រោះរវល់នឹងអាបីនាក់ពេក កំណត់ហេតុដើរកំសាន្តសូមចប់ត្រឹម៣ភាគនេះឯង 😀
មើលផងដែរ៖ កំណត់ហេតុ៖ សម្រាកលម្ហែរនៅបូកគោ(១).
ម៉ាក់ក្តាមបីគ្រឿងអើយ ខ្ញុំក៏ត្រូវមាត់អ្នកលក់ដែរ រួចបង្ខំចិត្តទិញរបស់គេទាំងមិនពេញចិត្ត។ ក្តាមសេះនៅកំពង់សោម ១គីឡូ = ២៨០០០៛ តែដូចជាស្រស់ល្អ មានសាច់គ្រាន់បើ។ ឱ្យគេចចំហុយរួចក្លាសេផ្ញើទៅកំពង់ធំ។
អ្នកលក់ដូរគឺចឹងតែរហូតហ្នឹង បន្លំ រើសក្តាមឱ្យខ្ញុំតូចៗ ដល់ពេលស្ងោរបានដឹង។
ចូលចិត្តចូលចិត្ត
បងមិនព្រមរើសខ្លួនឯង ហើយយកចំហុយខ្លួនឯងទៅ នៅផ្សារមានអ្នករកស៊ីចំហុយដែរតើ ពេលគេចំហុយយើងនៅចាំមើល អត់អីទេ។ នៅកំពង់សោម មិនដែលអីទេ ណាស់តែនៅផ្សារកំពតហ្នឹងតាហ្មង ខ្ញុំជួបមិនដឹងប៉ុន្មានដងហើយ cheating ទាំងភ្នែកស្រស់ហ្មង
ចូលចិត្តចូលចិត្ត
ខ្ញុំអត់សូវចេះ អត់ដឹងអីទេ ពិបាកណាស់ ដើរផ្សារចឹងទាល់តែ មានអ្នកគេចេះគេស្ទាត់បានទៅរួចជាមួយអ្នកលក់។
លើកក្រោយឯងសុំដើរជាមួយម៉ាក់អាបីនាក់ហើយបានបាន
ចូលចិត្តចូលចិត្ត
ចុះមានឆ្អីបង រីករាយជានិច្ច
ចូលចិត្តចូលចិត្ត
អ្នកលក់និងអ្នកទិញមិនបានអរគុណគ្នាទៅវិញទៅមកទេ …
ចូលចិត្តចូលចិត្ត
អរគុណមិនកើតទេ លោកពូ បើអ្នកទិញពេលនោះកំពុងតែហ៊ឹងស្លឹកត្រចៀកង៉ឺងនោះ
ចូលចិត្តចូលចិត្ត
ខ្ញុំយល់ពីស្ថានការណ៍នោះហើយ ដែលគួរអោយស្ដាយ…ស្រុកយើង! ។
ខ្ញុំក៏ធ្លាប់អ្នកលក់បោកប្រាសបន្លំកណ្ដាលថ្ងៃដែរ…កាលមកលេងស្រុកខ្មែរដំបូង
នាឆ្នាំ១៩៩៩ ខ្ញុំដើររើសរកទិញអាវម៉ូតមានហោប៉ៅច្រើននិងមានប៉ូលស្មាពណ៌
កាគី ។ ដើររកស្ទើរពេញផ្សារ មានតែលេខធំហួស XL។ មានតែមួយគត់លេខ M
ត្រូវទាំងទំហំខ្ញុំ ទាំងព៌ណទាំងម៉ូដ ប៉ុន្តែអ្នកលក់រឺងថ្លៃ ប្រហែលឃើញខ្ញុំដើររក
វក់វីឡើងចុះ ។ ខ្ញុំក៏ទិញយក អោយគេខ្ចប់អោយយ៉ាងល្អល្អិត …មានអីដល់ទៅដល់
ផ្ទះ ក្រោយពីជិះកបាល់ហោះអស់រាប់ពាន់គីឡូ បើកកញ្ចប់ស្រាយយកមករកពាក់
ហាសហា៎….អាវលេខ XL សោះ ហួសចិត្ត ។ រឿងអោយគេស្ងោក្ដាមស្ងោបង្កងអោយ
ក៏ធ្លាប់លឺគេនិយាយដែរ បើមិននៅបើកភ្នែកក្រលួងចាំមើលទេ អោយអាធំៗខ្លាញ់ៗ
ទៅ ដល់ស្ងោឆ្អិនមុខជាបានអាតូចៗស្គមៗឆ្អិនៗមកវិញហើយ …យ៉ាប់ ! 😀
ចូលចិត្តចូលចិត្ត
ខ្ញុំជួបហើយពូ!
ចូលចិត្តចូលចិត្ត
បើតែរបៀបហ្នឹង ធើម៉េចទាក់ទាញទេសចរបានទៅ Kingdom of Wonder (always wonder why???)
ចូលចិត្តចូលចិត្ត
និយាយពីទិញអាវនេះ ខ្ញុំក៏ធ្លាប់ជួបដែរលោកពូ។ ទិញអាវកាក់ក្នុងប្រុស(អោយប៉ាវា) រកលេខ៣៨ គេថាមានតែមួយទេ ខ្ញុំចង់បាន២ គេថាយកអាលេខ៤០ មួយទៅ ទំំហំមិនខុសគ្នាប៉ុន្មានទេ វាស់ទៅមែន មិនខុសគ្នាច្រើនទេ ខ្ញុំក៏អូខេ អោយគេខ្ចប់អោយ ស្រាប់តែមកដល់ផ្ទះ មិនអោយលេខ៤០ អោយដល់លេខ៤២ ព្រះម្ចាស់ថ្លៃ! ពាក់ម្ដេចកើត ដូចខ្ចីគេពាក់ មានអីទុកចោលទៅ ខ្ជិលយកទៅដូរ បើយកទៅដូរបានទាល់តែយើងមានជំនាញឈ្លោះ ទើបនិយាយទៅឈ្នះអ្នកលក់។
ចូលចិត្តចូលចិត្ត
នៅមានច្រើនទៀត ដូចជាទិញកម្មវិធីហ្វ្លាសមួយមក បានតែប្រអប់សំបកក៏មាន។ល។
តែណ្ហើយចុះ….ទុកមុខអោយជាតិខ្មែរយើងខ្មែរអែងខ្លះ ខ្មាស់បរទេស !
ពីជ្រុងខាងអ្នកលក់ គេមានអ៊ុត្តមគតិនិងប្រាជ្ញាដ៏ឈ្លៀសវៃផស់គេដែរថា
អ្នកទិញណាសាញពេក ស្វិតពេក គេលៃលកលក់អោយទៅតាមហ្នឹងដែរ 😀
ចូលចិត្តចូលចិត្ត
អ៊ូយ បងស្រីដូចខ្ញុំម្លេះ ខ្ញុំមិនចូលចិត្តការឈ្លោះប្រកែកជាមួយនឹងអ្នកលក់ដែលអសីលធម៌មួយចំនួននោះសោះ។
បើនិយាយទៅ អ្នកលក់ណាចេះនិយាយរាក់ទាក់(មិនមែនបញ្ជោរ) និងដាក់តម្លៃលក់គួរសមនោះ គឺខ្ញុំច្បាស់ជានៅដុះស្នឹមកន្លែងគាត់មិនខានទេ ហាហា 😀
ចូលចិត្តចូលចិត្ត
ហ្នឹងហើយ ជួនកាលរបស់គេនោះមិនល្អលើសអ្នកលក់ដទៃប៉ុន្មានទេ តែសំដីគេទទួលភ្ញៀវ ចឹងហើយ អ្នកទិញពិតជាចង់ទៅទិញទៀតមិនខានទេ
ចូលចិត្តចូលចិត្ត
ខ្ញុំឆ្ងល់ណាស់បងអ្ហើយ តើអ្នកលក់ទាំងនោះ លក់ឥវ៉ាន់ឲ្យអ្នកទិញ ឬទិញឥវ៉ាន់មកសម្រាប់ទុកមើល?!
យុទ្ធសាស្ត្រលក់ម្នាក់ៗដូចជាកំពូលតែម្តង។
ចូលចិត្តចូលចិត្ត
ថឹមថូវ 😀
ចូលចិត្តចូលចិត្ត
គាត់ឥតបានរៀនខាង ម៉ាខិតធីង
ចូលចិត្តចូលចិត្ត
ហ្នឹង ហើយបែបឥតបានរៀនពីយុទ្ធសាស្រ្តនៃការទំនាក់ទំនងខាងនិយាយទេមើលទៅ ហាហា
ចូលចិត្តចូលចិត្ត
បងមានបានឃើញស្លាកនេះទេ ? http://tamabloveyaymab.wordpress.com/2011/09/07/welcom-to-kampot/ ស្លាកនេះខ្ញុំថតនៅភ្នំពេញ តែពេលដើមឆ្នាំ២០១២ ដែលខ្ញុំនៅកំពត ខ្ញុំឃើញស្លាកនេះទាំងនៅផ្លូវកាច់ចូលទឹកឈូ និង នៅផ្សារធំកំពត ។
ចូលចិត្តចូលចិត្ត
I didn’t see, maybe they take it out.
ចូលចិត្តចូលចិត្ត