ដំណោះស្រាយរបស់ម៉ាក់អាបីនាក់​ចំពោះ​កូន​ដែល​រើសចំណី

នូនូ ជាកូនដែលរើសចំណីបំផុត និងមិនញ៉ាំបន្លែទេ។ រាល់ពេលញ៉ាំបាយ នូនូកំរនឹងអង្គុយជាប់នៅនឹង​កៅអី​ណាស់ គេតែងដើរចច្រប់និងនិយាយមិនឈប់មិនឈរ​ជាមួយនាងនាង។ តើកូន​តូច​របស់​អ្នក​ជា​ក្មេងដែលពិបាកញ៉ាំដូចជានូរបស់ខ្ញុំទេ? បើចាបតូច​របស់អ្នក​ជា​ក្មេង​ដែល​រើសចំណី​និង​មិន​សូវ​ញ៉ាំ​បាយ​ដែរ​ ខ្ញុំមាន​វិធីតិច​តួច​ខ្លះ​ដែល​អាចជួយអ្នកម៉ាក់ថ្មីថ្មោងបាន។

1. កំរិតការញ៉ាំជាតិទឹកមុនពេលបាយ៖ មានដូចជាទឹកធម្មតា ទឹកដោះគោ ទឹកដោះគោជូរ ទឹកផ្លែឈើ… កុំអោយគេញ៉ាំរបស់អស់នេះនៅពេលជិតដល់ពេលបាយ បើបាយនៅ​មិនទាន់​ឆ្អិន អោយញ៉ាំគ្រាន់តែសំរន់សិនបានហើយ ក្រពះ​ក្មេងប៉ុននេះតូចណាស់ ហើយងាយឆ្អែតផង បើអោយញ៉ាំទឹកច្រើន មុខតែអង្គុយសំលក់បាយមិនខានទេ ។
2. អោយគេជួយពេលអ្នកចំអិនម្ហូប៖ នូនូមិនចូលចិត្តបន្លែខៀវទេ តែនៅពេលមួយនោះ ម៉ាក់ស្លប្រហើរទំពាំង ម៉ាក់បានប្រាប់នូនូអោយជួយបេះបន្លែស្លឹកងប់ ពេលប្រើ​ដំបូង​នូនូ​ធ្វើអោយរញ៉េរញ៉ៃបន្លែដែលបេះហើយដាក់ចូលគ្នាជាមួយអាមិនទាន់បេះ(អូយវិលមុខ!!! 🙄 🙄 🙄 ចង់តែដេញចេញពីផ្ទះបាយទេ តែទ្រាំបន្តិច ដើម្បីអោយនូនូញ៉ាំបាយ បាន​ច្រើន)។ ដល់ពេលញ៉ាំបាយ នូញ៉ាំបាយបានច្រើនជាងរាល់ដង ហើយអួត​ប្រាប់​អ្នក​គ្រប់​គ្នាក្នុងផ្ទះថា សម្ល​នេះជាស្នាដៃនូ ហេហេហេ 😀 😀 😀 គេពេញចិត្តនឹងខ្លួន​គេ​ខ្លាំង​ណាស់។
3. តុបតែងចាន និង អាហាររបស់គេ៖ នូចូលចិត្តញ៉ាំអាហារដោយដាក់ចានថ្មី ស្លាបព្រាថ្មី ប្លែកមិនដូចចានអ្នកផ្ទះ នូនឹងញ៉ាំបាយបានច្រើនកាលណាម៉ាក់រៀបចំតុបតែងម្ហូប​បាន​ស្អាតប្លែកភ្នែក បើមិនញ៉ាំបានច្រើនយ៉ាងហោចណាស់ក៏នូភ្លក្សបន្តិចដែរ។
4. ម៉ាក់ត្រូវធ្វើជាគំរូអោយកូនឃើញ៖ ម៉ាក់ចង់អោយនូញ៉ាំ ផ្កាខាត់ណា ត្រកួន ត្រសក់ ស្នៀតពោត… ម៉ាក់តែងញ៉ាំមុននូ ពេលនូឃើញនូក៏សាកតាមដែរ ពេលត្រូវចិត្តក៏ញ៉ាំច្រើន ពេលមិនត្រូវចិត្ត​ក៏បានតែមួយម៉ាត់ហ្នឹងឯង(តែក៏ប្រសើរជាងអត់ញ៉ាំបន្លែសោះដែរ មែនទេ?)
5. ច្នៃកុំអោយគេមើលឃើញថាមានបន្លែនៅក្នុងចានអាហារ៖បើគេនៅតែ​ចចេស​មិនព្រម​ញ៉ាំបន្លែ ម៉ាក់នេះត្រូវច្នៃលៃយ៉ាងណាអោយបន្លែនោះបាត់រូបរាងដើម មើលលែង​ដឹង​ថា​ជា​បន្លែ។ មើលប្រកាសនេះ ​វិជ្ជាមេផ្ទះ​៖ បាយឆាសាច់ក្រក​និង​សណ្ដែកហឡាន់តាវ(green bean)
6. ដួសបាយអោយគេតិចបានហើយ៖ បើគេញ៉ាំអស់ ទារថែម សឹមថែមអោយ កុំអោយគេឃើញបាយច្រើន ណាយលែងចង់ញ៉ាំ​តែ​ម្ដង​។

សូមអ្នកម៉ាក់ទាំងអស់ធ្វើចិត្តអោយត្រជាក់ កុំខឹងគេដែលគេញ៉ាំតែបន្តិចបន្តួច រំលឹកខ្លួនឯងថា ក្រពះក្មេងតូច​វាតូច ដូច​តែខ្លូនគេដែរ ចង់អោយគេញ៉ាំច្រើនហួសពីចំណុះគេម្ដេចបាន។ កុំធ្វើអោយ​បរិយាកាស​តុញ៉ាំបាយ ក្លាយជាសមរភូមិជាមួយកូន( កន្លែងចុងក្រោយនេះ ម៉ាក់​អា​បី​​នាក់​នៅមិនទាន់ធ្វើចិត្តបានទេ កាលមុន​គំរាមនូថាចង់យក​ជីឡាវ​ដាក់​ច្រក​បាយចូល​មាត់នូ​តែ​ម្ដង​ដើម្បីកុំអោយពិបាកបញ្ចុក តែឥឡូវឈប់គំរាមបែបនេះហើយ ព្រោះអី​នូ​លែង​ចាញ់​បោក​ហើយ 😆 😆 😆  )៕