សំភារៈសង្គ្រោះ​បឋម

រៀងរាល់ការធ្វើដំណើរផ្លូវឆ្ងាយ ខ្ញុំតែងមានសំភារៈ​សំរាប់សង្គ្រោះបឋមនៅក្នុងឡាន ឬក្នុងកាបូបជានិច្ច។ វាជាការប្រសើរណាស់ដែលមានរបស់អស់នេះនៅជាប់ខ្លួន ជាពិសេសអ្នកដែលធ្វើដំណើរហើយមានកូនតូចកូនធំជាប់ដៃជាប់ជើងដូចម៉ាក់អាបីនាក់។ វាមិនចំណាយអីប៉ុន្មានទេ ក្នុងការរៀបចំអោយមានរបស់​អស់ទាំងនេះតាមខ្លួននោះ។ ខាងក្រោមនេះគឺជា First aid kits របស់ខ្ញុំ៖

1. អាល់កុលឬជែលលាងដៃសំលាប់មេរោគមួយកូនដប៖ សំរាប់សំអាតដៃអ្នកសិន មុនពេលបិតមុខរបួស
2. សំលីស្អាតមួយកញ្ចប់៖ សំរាប់ជ្រលក់អាល់កុល ជូតរបួស
3. បង់បិតដំបៅបួនប្រាំបន្ទះ៖ វាមិនអត់ប្រយោជន៍ទេ ជឿម៉ាក់អាបីនាក់ទៅ 😎
4. ថ្នាំបំបាត់ការឈឺចាប់ក្ដៅខ្លួន៖ ក្មេងតូច ឬខ្លួនយើងផ្ទាល់​ងាយនឹងឈឺណាស់កាលណាធ្វើដំណើរឆ្ងាយ
5. ថ្នាំបំបាត់រាគរូស(នរណាហ៊ានធានាថាចំណីអាហារនៅខាងក្រៅផ្ទះមានអនាម័យ? ស្រុកណាមិនដឹងទេ តែបើស្រុកខ្មែរធានាហ្មង ធ្វើអីកយ ធ្វើលក់ទេតើមិនមែនហូបខ្លួនឯងឯណា (sic!) 😆
6. ថ្នាំបំបាត់ចុកពោះ៖ អាហ្នឹងវាមកជាមួយគ្នានឹងរាគហើយ 😀
7. ថ្នាំបំបាត់រមាស់ដោយសារអាលែរហ្ស៊ី៖ នាងនាងរបស់ខ្ញុំ​តែងមានកើតរោលរមាស់ នៅពេលណាដែល លេងទឹកសមុទ្ទ ចុះអ្នកវិញ?
8. សីតុណ្ហមាត្រ Electronic Thermometer (ស្ទង់កំដៅខ្លួនកូន នោះអី )
9. Hydrocortisone Cream ប្រើសំរាប់លាបពេល សត្វល្អិតទិចឬខាំ ជួយអោយបាត់រមាស់ភ្លាមៗ
10. Antibiotic Cream លាបកាលណាមានមុតឬ ដាច់របួសកន្លែងណាមួយ មុនពេលដាក់បង់បិតដំបៅ វាជួយអោយឆាប់សះមុខរបួស 🙂

នៅពេលដែលអ្នកមានគ្រប់មុខហើយ អ្នកអាចដាក់វាចូលក្នុងកាបូបមួយជិតស្ងួតល្អ មិនចាំបាច់ទាល់តែមានកាបូបថ្លៃ ឬប្រអប់ពិសេសអីទេ ដាក់អោយតែជិតល្អរួច គប់ប្រាវទៅក្នុងឡានជាការស្រេច។ អ្នកអាចរីករាយនឹងដំណើរកំសាន្តដោយ មិនមានការបារម្ភបានហើយ៕

😀 😀 😀