វិជ្ជាមេផ្ទះ៖ វិធីធ្វើទឹកប្រហុកអោយឈ្ងុយឆ្ងាញ់

សំរាប់ជ្រលក់ជាមួយពោះគោស្ងោរ និង សាច់អាំង

គ្រឿងផ្សំមាន

• ប្រហុកសាច់ (ប្រហុកសៀមរាបត្រីកំភ្លាញ) ១ខាំ
• ក្រូចឆ្មារ ២ផ្លែ
• ស្កស ៥ ស្លាបព្រាកាហ្វ
• រំដេង ១ជ្រុងតូច(ប៉ុនកូនដៃ) បុកអោយម៉ត់
• ខ្ទឹមស ២កំពិសធំ បុកអោយម៉ត់
• គល់ស្លឹកគ្រៃហាន់ ១ចានចង្កិះ
• សណ្ដែកដីលីងតិចឬច្រើនតាមចូលចិត្ត

វិធីធ្វើ

ចិញ្ច្រាំប្រហុកអោយម៉ត់ល្អ ដាក់ស្កសចូល កូររហូតក្លាយជាល្បាយសព្វសាច់ ទើបថែមរំដេងខ្ទឹមស និងច្របាច់ក្រូចឆ្មារដាក់ រួចកូរបន្តទៀត ( បើដាក់ក្រូចឆ្មារចូលមុនស្កសនោះនឹងធ្វើអោយសាច់ប្រហុករឹងដុំៗមិនចូលជាតិសព្វទេ «មានជំនាញហើយក្រោយពីហាត់យុទ្ធសិលិ៍រាប់ដងមិនអស់ 😀 »)។ ពេលដែលសព្វហើយ ចាក់ដាំទឹកក្ដៅដាំពុះប្រហែល ១២០ម.ល (បើចូលចិត្តខាប់អាចបន្ថយទឹកក៏បាន) ចូលក្នុងប្រហុកនោះ ទើបថែមគល់ស្លឹកគ្រៃហាន់ និងសណ្ដែកដីលីងចូលជាការស្រេច។

បញ្ជាក់៖ រសជាតិគួរអោយមានជូរ ផ្អែម ប្រៃលាយគ្នា